Minister di Finanzas y Economia, Xiomara Maduro a declara na Bon Dia Aruba cu gobierno ta consciente di e situacion economico cu nos pais ta confronta.
Sinembargo tin gastonan cu mester atende, entre nan di overtime y proyectonan PPP (Private Public Partnership), cu gobierno anterior a bin cu nan y cu mester atende pa mantene nos credibilidad financiero. Pero e unico manera ta esun di genera mas fondo den caha di gobierno pa medio di e cambionan den reforma financiero, cu e biaha aki lo bin hunto cu presupuesto 2020 den parlamento.
El a mustra cu entre e dilema di haci of no haci nada pa atende cu e situacion aki, gobierno ta kies pa haci algo. Un di nan ta controla y baha nan gasto, asina el a laga sa. Pero e mandatario a indica cu a pesar cu e panorama no ta uno facil, pero e cifranan ta mustra cu nos ta den bon direccion.
Panorama economico.
E mandatario ta reconoce cu e panorama economico cu Banco Central di Aruba a yega di publica ta uno ‘real’. E instituto aki a proyecta menos crecemento na 2020 cu na 2019 caba, na 2,4% nominal. E pregunta formula na minister ta: Con lo por saca mas fondo pa gobierno sigui atende cu su gastonan for di un economia cu ta restringi cada bes mas cu medidanan?
E ta cualifica esaki como un periodo dificil pa pais Aruba, y e ta compronde esey. Maduro a laga sa cu gobierno ta trahando cu e ‘prudencia’ necesario pa crea un stabilidad pa nos como pais por sali for di e reto aki sin ‘cu ta muri’. E peso adicional di mas medida pa yega na e fondo necesario ta un proceso fastioso, ‘pero hunto nos tin cu haci’e’, el a bisa.
El a añadi cu e proceso aki a demanda tempo y esfuerso y esaki ta un motibo pa kico nan a tarda cu e reforma fiscal y presupuesto 2020. Den e esfuerso aki nan a explora algun alternativa, e minister ta yama nan ‘avenidanan,’ entre otro reduccion di loonbelasting y tambe bahamento riba tarifa di coriente pa alivia un poco e peso riba economia domestico.
Minister a bisa cu na medida cu tin crecemento economico, e ta positivo. Den nos region mes tin paisnan cu no a crece economicamente y nan tin retonan financiero tambe. El a splica cu pa loke ta e parti di presupuesto relaciona cu gasto di gobernacion, pais Aruba a keda prudente considerando un desaroyo economico di 1%. Kiermen si economia ta bay miho y si tin un crecemento di 2.4% nominal, manera BCA a yega di indica, e ta considera cu sin duda e ta un bon noticia. “Importante ta cu bo tin crecemento. Tin movecion den e bon direccion,” el a bisa.
Otro factor cu e ta considera importante pa pais Aruba confronta su reto financiero ta cu nos tin stabilidad. E sa cu e implementacion di medidanan pa obtene mas fondo pa gobierno atende su gastonan ta dificil. Pero e ta considera pio si gobierno ta keda sin haci nada. E ta haya cu esaki no ta un opcion. “Pasobra si bo ta keda sin haci nada, abou bo ta bay,” el a declara.
E mandatario a bisa cu nan ta creando un espacio financiero pa keda inverti riba nos hendenan pa nan keda central, y un forma ta via e crisis plan social.
