Entrante 1 di mei 2025, Banco Central di Aruba (CBA) a mantene e tasa di reserva obligatorio pa banco comercial na 12,5%. E decision aki riba maneho monetario ta mantene e balansa minimo cu banco comercial local mester tene na CBA.
Puntonan principal
Incertidumbre global eleva:
Incertidumbre y falta di claridad riba politica comercial di Merca, como tambe e riesgo di comercio internacional eleva tin e potencial pa directamente y indirectamente afecta e economia di Aruba. Sinembargo, e materialisacion specifico di e repercusionnan economico pa Aruba ta depende di varios factor, considerando e evolucion instabil y continuo di e accionnan di e politica comercial aki y consecuentemente di e desaroyonan global.
Reservanan adecua a pesar di crecemento den credito:
Te cu maart 28, 2025, reservanan a surpasa substancialmente e metriconan di reserva cu CBA ta monitor, a pesar di un aumento den credito. Considerando e reserva adecua robusto y e buffer amplio di reserva, CBA ta anticipa cu reservanan oficial y internacional lo keda suficiente adecua durante 2025.
Likides excesivo:
Den 2024 y te cu februari 2025, crecemento den likides excesivo (LE) di banconan comercial a surpasa expansion total di credito, cu expectativa di un aumento di LE den termino medio.
Inflacion abao:
Na februari 2025, e tasa di inflacion midi den e ultimo 12 luna compara cu e 12 luna prome a permanece na 1,6%, combina cu e tasa di inflacion midi na final di luna contra e mesun luna di e aña anterior na 0,5%.
CBA ta sigui monitor indicadornan monetario y economico y lo ahusta su posicion di maneho monetario manera necesario pa sostene e tasa fiho di e florin na e dollar Mericano.
