Ayera mainta durante un conferencia di prensa Consul di Colombia na Aruba, Sr. Gustavo Serrano Amaya a anuncia cu e weekend aki e Barco ARC Gloria di e Marina Colombiano, cu a bishita diferente waf rond mundo, lo yega na e waf turistico di Aruba.
Consul Serrano Amaya a splica cu e barco lo yega diadomingo awor, dia 3 di augustus pa mas o menos 8’or di mainta na e waf turistico di Aruba. Durante e estadia di e barco na Aruba, cu lo ta desde diadomingo 3 di augustus te diaranson 6 di augustus lo tin diferente actividad abordo.
El a sigui splica cu lo tin algun tayer, charla y dia 3 di augustus na yegada di ARC Gloria lo tin un ceremonia protocolario cu lo conta cu presencia di Gobernador di Aruba SE Alfonso Boekhoudt, prome minister Mike Eman, varios minister, parlamentario y cuerpo consular di Aruba, y otro mandatarionan.
E ceremonia protocalario aki tambe lo ser presidi pa e embahadora Colombiano di Reino Hulandes, Dr. Carolina Olarte Bacares, kende lo yega Aruba diasabra.
“Nos kier extende e invitacion aki na henter pueblo di Aruba y na nos conciudadanonan pa bin bishita. Riba e dia di e ceremonia formal, entrada na e waf lo ser permiti. Manera mi a menciona, e publico lo ser permiti pa bishita dia 3, riba dialuna, y riba diaranson, te ora e barco sali merdia, cu e lo sali pa su siguiente destinacion. Esaki ta un gran oportunidad pa explora e diferente skinanan di e barco, su varios camber, y siña di Colombia su historia maritimo y cultural,” e Consul a remarca.
Consul Serrano Amaya a indica cu e Consulado di Colombia tabata den contacto caba cu e
varios fundacion y asociacion, no solamente di nan compatriotanan Colombiano,
pero tambe di e pueblo Arubano y algun di e fundacionnan aki lo ta participante na e varios evento cu nos lo ta tumando luga riba e barco. El a splica cu lo tin presentacion di bailenan cultural, agrupacion musical, tayer y charlanan, un evento gastronomico y un evento pa empresario.
El a agrega cu ademas ta bay tin tambe oportunidad pa dialoga cu comerciantenan y algun autoridad di e isla dialuna merdia y anochi lo tin un conferencia cu lo conta cu mas o menos 200 persona di e sector di comercio, salubridad, di gobierno y tambe personanan cu ta forma parti di diferente area y organisacion di e pueblo Arubano
Consul Serrano Amaya a enfatisa cu ta importante pa tuma nota cu lo no permiti bishita na e barco riba diamars, pa motibo cu dos barco crucero hopi grandi lo ta yegando e dia ey, y autoridadnan di APA no kier e interaccion aki entre turista y hendenan cu lo kier bishita e barco pa motibonan di seguridad.
