E siman aki, un accidente a tuma luga riba lama caminda un boto a dal pega riba rif na momento cu e tabata nabega yega Aruba.
E Centro Maritimo di Operacion di Wardacosta den oranan di anochi a ricibi un yamada cu tin un accidente cu a tuma luga den area di Barcadera caminda un boto lo a pega riba rif. Mesora Wardacosta a dirigi un Metal Shark pa bay na e area.
Na yegada na Barcadera, e agentenan di Wardacosta a mira e boto y dos persona riba tera. E personanan a declara cu durante e biahe, e embarcacion a bay pega riba un rif y cu un di e hombernan a haya herida na su curpa. Un barco local tambe a yuda duna asistencia y e agentenan di Wardacosta a yuda e dos homber abordo di e Metal Shark. Despues nan a keda transporta pa e pier di Daltra banda di Barcadera, unda un ambulance tabata warda nan.
