E compania estatal Alba PetroCaribe Belize Energy Limited (APBEL) a declara cu el a suspende e acuerdo di larga duracion cu e empresa di Belize Trafigura/Puma y e empresa petrolero estatal Venezolano PDVSA, bao di e programa PetroCaribe.
APBEL a bisa den un declaracion cu e decision pa suspende e programa a bin despues di consulta cu gobierno di Belize, Trafigura/Puma y PDVSA y cu APBEL a dicidi di suspende compra di producto petrolero bao di e acuerdo di PetroCaribe, cu efecto inmediato.
PetroCaribe ta e alianza di suministro di petroleo di varios pais Caribense cu Venezuela pa compra di petroleo bao condicion di pago preferencial. E alianza a wordo lansa na 2005 y ocho aña despues PetroCaribe a acorda relacion cu e Aliaanza Bolivariano pa Americas (ALBA), pa actua mas aya di petroleo y promove cooperacion economico.
Durante e periodo 2007 te 2009, PVDSA a entrega 457.680 bari di producto petrolero refina, balora na mas di US$41 miyon den 15 cargamento na Belize bao di e terminonan di e convenio, di acuerdo cu un declaracion poni riba website di APBEL.
APBEL a bisa cu nan a bin topa cu un cantidad di problema cu mantene un suministro confiabel di producto di parti di PDVSA y esaki, entre otro asunto, a resulta den costonan mucho mas halto pa unidad di fleta ora Puma a keda forsa pa haci areglo di ultimo ora pa transporta producto via tera y ora barconan ta bin aden mita carga.
“Nos a keda informa di banda di PDVSA cu, na cierto momento, nan mester a cumpra riba spot market pa por cumpli cu nan compromiso cu nos: Esaki definitivamente no ta loke tabata e intencion cu e programa di PetroCaribe. “Nos ta masha agradecido na Republica Bolivariano Venezuela y PDVSA pa tur cos cu nan a trata di haci pa mantene nan promesanan cu nos bao di e programa di PetroCaribe, pero no tin sentido pa forsa mantene e areglo aki bao di e circunstancianan aki,” APBEL a bisa den e declaracion.
Informe di medionan na Belize a bisa cu e programa di PetroCaribe a genera como BDZ$450 miyon (US$ 225 miyon) na fondo pa gobierno di Belize.
Funcionarionan di gobierno di Belize, Trafigura/Puma y PDVSA y APBEL ta anticipa un encuentro e luna aki pa determina posibilidad di reanuda suministro di Venezuela den futuro.
“Mientras tanto, e empresa Beliseño Puma, encarga cu suministro na Belize di petroleo, ya a haci areglonan alternativo pa mantene un suministro sin interupcion di producto petrolero na Belize,” e declaracion ta añadi.
