Benny Nisbet (PPA): ‘Renobacion di Uncle Louis Store positivo, pero destin’e pa un otro departamento di gobierno’

ORANJESTAD – E decision di gobierno pa laga Monumentenzorg  drecha e edificio di Uncle Louis Store por wordo considera un decision positivo.  Pero e decision pa destina e edificio strategico y historico aki un bes mas den man di un departamento di gobierno ta un decision robes  ‘A wrong decision” y lo stroba San Nicolas pa crece comercialmente y turisticamente!

Nada contra e respetabel departamento di gobierno ‘Naturalesa y Ambiente’ pero mescos cu PPA a señala esaki añanan atras ora e gobierno di AVP a pone departamento di Aduana den e edificio aki PPA ta ripiti nos ponencia un bes mas.

Decision totalmente robes!!

Locual San Nicolas mester ta un desaroyo cu lo contribui na un impacto comercial y turistico.  Si uza e edificionan di ex Acme Store(actualmente un restaurant) di nivel, x Uncie Louis Store y  ex- All Electric/x Benito’s esta e parti pariba di dje como tres restaurant di nivel esaki lo crea un ambiente turistico. Otro negoshinan cu tin di haber cu desaroyo comercial/turistico lo habri porta y e spinoff di e desaroyo aki lo ta inmenso pa San Nicolas.  E lo tin un efecto positivo riba e movecion turistico tanto durante dia como anochi ora turistanan wordo treci pa come algo na San Nicolas basa riba un desaroyo asina. Cafenan lo wordo crea combina cu negoshinan cu ta bende souvenir y e necesidad local igualmente.

Pero lamentablemente e decision pa haci ex Uncle Louis Store un departamento di gobierno  lo no contribui na un desaroyo asina.

Esaki PPA ta considera un estorbo pa desaroyo comercial/turistico di San Nicolas.

Un bes mas vision di AVP!!

PPA no por comprende cu p.e. e Ministro (AVP) cu a biaha pa  New Orleans den pasado na unda tin un desaroyo comercial/turistico renombra por a bin topa cu departamento di gobierno memey di e  desaroyo comercial aki. E decision pa Uncle Louis Store a wordo bendi y renoba pa Monumentenfonds y pa e departamento di ‘Naturalesa y Medio Ambiente’ wordo poni eyden ta data di e periodo di gobernacion di AVP y e actual gobierno cu NO tin su propio vision a simplemente ehecuta e vision robes cu AVP a laga atras.  Nos a wordo informa cu pa Monumentenfonds a renoba e edificio aki nan mester a ricibi un garantia cu e edificio lo a wordo ‘ verhuurd’ pa f. 16.000,– pa luna y como cu ningun comerciante lo a paga e huur absurdo aki anto den un bario comercial cu ta den problema pa hopi tempo, gobierno di AVP a tuma e decision den pasado pa gobierno mes ‘huur’  e edificio di Monimentenfonds y pone un di su departamentonan eyden. En bes cu gobierno mes por a renoba e edificio y ‘huur’ esaki na un grupo comercial cu un meta comercial/turistico cu lo por tin un ‘impacto regional’ positivo riba e vecindario.

PPA ta lamenta e decision aki!!

Mescos cu presencia di departamento di Aduana  kisas a contribui cu algun ‘pastechi por a wordo cumpra den San Nicolas, PPA   no ta mira cu e respetabel departamento di ‘Naturalesa y Medio Ambiente’ su presencia lo contribui cu mucho mas.

Dept Naturaleza y Medio Ambiente na halto  y un restaurant abou cu permiso pa uza e plasa dilanti di dje?

Kisas por salba e situacion aki si e Dept di Naturaleza  y Medio Ambiente bay riba e piso na halto y ainda busca un  grupo den mundo di nos ‘Cuisine Caribense’ pa presenta un proyecto cu lo mag di haci uzo di e  plasa chikito nan dilanti …pero como cu PPA ta consciente con nos gobernantenan ta pensa y/of Monumentenzorg cu esaki lo  no wordo ehecuta. Naturalmente un decision positivo asina lo mester wordo acompaña cu decisionnan pa stimula e transportacion publico a pa San Nicolas den un forma mas creativo !!

Un Lastima si !!  Esaki ta sosode ora gobernante cu ta pretende cu nan a bin salba San Nicolas ………No sa nada di e historia y desaroyo multi-cultural di San Nicolas.

E maneho aki ta matando e ultimo parti di locual a resta di locual San Nicolas tabata y e potencial scondi di locual San Nicolas realmente lo por bira. (They are killing we Culture !!)

No kabe duda cu tin ‘interesnan economico y turistico’ cu NO ta desea pa  e potencial di San Nicolas realmente biba!! Y kisas p’esey tambe decisionnan asina incorecto ta continua pa tuma luga……pa nan San Nicolas mag di tin un refineria/Upgrader cu su holo desagradabel y nada mas…..Tene nan asina pa No stroba interes comercial di otro parti di nos Isla.

Senores, nos Isla ta chikito…..Nos isla tin diferente parti cu tin  potencial enorme cu nos no ta haciendo uzo di dje y San Nicolas ta un di e partinan aki. Ta tene  San Nicolas frena den un ‘status quo’ pa strob’e di desaroya su mes na locual realmente e lo por bira.

PPA ta considera e decision pa pone un bes mas un departamento di gobierno den un caya central cu ta un caya masha chikito un decision robes- The Wrong decision…….Time will tell once more……’ Tempo lo demostra cu e falta di un desaroyo comercial/turistico lo por a wordo grandemente sirbi si a bini un Uncle Louis  Bar & Restaurant cu un ambiente Caribense/Arubiano…..pero un bes mas unda falta un vision cla ta e tipo di decisionnan ‘ad hoc’ bo ta haya.

Y pa colmo decisionnan tuma pa e gobierno anterior  di AVP cu e actual gobierno no a desea di coregi pa falta di vision propio….Un lastima….!!

 

You May Also Like

AVP no tin un rol den formacion di gobierno nobo

Ayera un tiki pasa di 1or di atardi, minister presidente demisionario y lider di ...

San Nicolas: E cabay di campaña cu semper ta sali perdi

Aña tras di aña ta bira un target politico. Promesanan falso, proyectonan cu nunca ...

‘Prueba cu ex-minister Sevinger a maluza clausulanan dedica pa instancianan social educativo’

Lider di fraccion di POR, Marisol Lopez-Tromp a presenta un echo hopi cuestionabel pa ...

MEP: ‘Nos ta tene cuenta cu programa di partido, no relacion personal’

Despues cu Evelyn Wever Croes lider di partido MEP a termina di tene deliberacion ...