(AP) – Cardi B su cantica “WAP” a ricibi un significado nobo na e BET Awards: “Winning And Pregnant”. E artista ganador di Grammy, a revela su embarasa durante e presentacion live riba diadomingo, hunto cu su casa Offset, acompana di Quavo y Takeoff di e grupo Migos. Den e mesun anochi aki, Cardi B a gana e premio pa video musical di ana pa su video musical conhuntamente cu Megan Thee Stallion titula “WAP”.

Cardi B no por a keda pa accepta e honor na Microsoft Theater den Los Angeles, pero Megan Thee Stallion a acepta e trofeo den representacion di Cardi B, aunke durante su speech el a lubida di duna danki na Cardi B.

Sinembargo, e famoso cantante di e hit popular “Savage” a ripara e eror aki, y a haci mencion di Cardi B den su speech na momento di acepta su mesun trofeo, na momento cu el a gana Best Female Hip-Hop Artist bisando “Mi a lubida completamente di bisa ‘danki Cardi’ pa ponemi den e cantica “WAP” na prome luga, pa motibo cu e ta hacimi sinti hopi contento di ser reconoci pa un di mi coleganan den e industria, ken mi ta admira hopy y di ken mi tin un impreshon hopi positivo.”

Megan Thee Stallion tabata un di e ganadonan mas grandi di e anochi, ganando 4 trofeo en total. “Mi tin un impreshon hopi bon y admirashon hopi grandi pa tur e demas muhenan cu tabata nomina den e categorianan aki.” Megan a declara.

Den tur e celebracion di artistanan femenino, e BET Awards a pone enfoke ariba e hecho cu e luna aki ta celebra homosexualidad den Merca, cu un presentacion di e artista Lil Nas X, y un speech di Queen Latifa ken a duna dnki na su pareha y su yiu homber, na momento cu el a acepta e Lifetime Achievement Award, cual ta un trofeo honorando su carera.

Queen Latifa a ser honora pa su carera ilustro como un rapper ganador di Grammy, un actor cu ta ganador di Golden Globe, y un productor di television cu a gana varios Emmy. Rapsody y Monie Love taba e musica di fondo durante e tribuo cu un presentacion di e hit di Queen Latifa “Ladies First”, sigui pa un presenctacion di Lil Kim y MC Lyte, ken a canta e cantica “U.N.I.T.Y.”

Lil Nas X a causa furor den e audiencia cu e presentacion di su hit No.1 “Montero (Call Me By Your Name), cual a caba cu e rapper haciendo e acto intimo di sunchi cu un di su bailarin masculino.

Su presentacion tabata basa riba Egypto di temponan atras, na un manera similar di Michael Jackson su “Remember the Time”, na cual Lil Nas X a haci tributo cu un baile na mita di e presentacion.

E anochi aki tambe a duna oportunidad na algun di e celebridadnan pa haci honor na nan mamamanan, manera Queen Latifah, ken a atende e ceremonia aki compana pa su tata, cu a hiba un potret di su mama cune riba e escenario na momento di acepta su trofeo, tambe Megan Thee Stallion a haci recordacion y mencion di su mama, ken a fayece den ana 2019, durante su speech bisando “e no por ta cumi awe, pero tur dia e ta den mi pensamentonan y ta e motibo dicon mi ta sigui bay dilanti”. Jazmine Sullivan, ganado di album di e ana pa su mini album “Heaux Tales” a atende e ceremonia aki conhuntamente cu su mama, ken actualmente ta den un bataya contra cancer.

“Mi mama a ser diagnostica cu caner di pecho dos ana pasa, y nos no por a premira nada di esaki den nos futuro, pero Dios ta asina fiel na nos cu mi mama aworaki ta den remision” Jazmine a comenta, agregando “esaki ta mi premio, esaki ta mi regalo. E ta nifica hopi mas pami cu mi mama por ta kinan cumi awe. El a apoyami henter mi bida.”

E ceremonia a ser dedica na e ana di hende muher di color scur, manera revela pa e anfitrion di e anochi Taraji P. Henson. Maxine Waters a bisa su frase famoso “Reclaiming my time” prome cu Sullivan a subi escenario pa un presentacion conhuntamente cu Ari Lennox. E prome trofeo di e anochi a bay pa Andra Day, ken a gana e trofeo pa mihor actris, mientras cu Darnella Frazier, e hoben cu a filma e situacion di George Floyd y Derek Chauvin, a gana e trofeo “Shine A Light”

Frazier no por a atende e ceremonia, pero e honor aki ta bin algun siman despues cu el a ser otorga un citacion special di Pulitzer Prizes pa su video, cual a yuda lansa un movimiento global di protesta contra inhusticia racial.

H.E.R tambe a asombra e audiencia cu su presentacion, y a gana miho artista femenino di R&B/Pop. E ganado di Grammy a bisa e audiencia cu e ta “hopi importante pa nos reconoce otro y celebra otro”. “Si nos mes no haci esaki, ken si?” e cantante a agrega.

Entre otro ganadonan ta inclui Chris Brown, ken a gana miho artista masculino di R&B/Pop, Giveon cu miho artista nobo, y Silk Sonic, e duo di Bruno Mars y Anderson .Paak, a gana e trofeo di miho grupo. E difunto Chadwick Boseman, a gana e trofeo di miho actor.