Beth Holloway, mama di e adolescente Mericano, Natalee Holloway kende a desaparece na Aruba na 2005, a entrega un keho criminal na Hulanda contra Joran van der Sloot. Mediante e paso legal aki, e ta spera cu fiscalnan Hulandes lo por logra ainda presenta cargo contra Van der Sloot pa morto di Natalee.
Segun medionan Hulandes a reporta ayera, Beth Holloway a entrega e keho na Ministerio Publico Hulandes, y e keho ta considera pa Holloway y su team legal como un intento final pa busca husticia casi dos decada despues di e caso cu a sacudi Aruba y atrae atencion rond mundo.
Natalee Holloway, e tempo aya di 18 aña di edad, a desaparece dia 30 di mei 2005 mientras e tabata den un vakantie di graduacion na Aruba. A mir’e ultimo biaha saliendo di un club nocturno na Oranjestad cu ciudadano Hulandes, Joran van der Sloot y dos amigo. A pesar di buskeda intensivo riba e isla y un investigacion largo, nunca a recupera su curpa.
E desaparicion rapidamente a bira un di e casonan di persona desaparecido reporta mas ampliamente na mundo, poniendo Aruba bao scrutinio internacional intenso y impulsando añas di investigacion y speculacion.
Pa hopi aña, Van der Sloot tabata considera e sospechoso principal den e caso, pero nunca el a keda condena pa desaparicion di Holloway. E caso na Aruba eventualmente a bira complica legalmente, y e ‘verjaringstermijn’ – e tempo den cual mester procesa cierto crimen – a caduca caba.
Sinembargo, desaroyonan nobo den añanan recien a renoba atencion riba e caso.
Na 2023, Van der Sloot a admiti den un corte na Merca cu el a mata Natalee Holloway. E confesion tabata parti di un acuerdo di culpabilidad relaciona cu un caso separa den cual el a extorsiona placa for di mama di Holloway a cambio di informacion tocante kico a pasa cu su yiu muher.
Na 2010, Van der Sloot a exigi 250.000 for di Beth Holloway, primintiendo di revela unda por a haya curpa di Natalee. Despues di ricibi un pago inicial, el a duna informacion falso. Despues el a admiti culpabilidad pa extorsion y fraude, y a keda sentencia na Merca cu 20 aña di prison pa e crimennan ey.
Segun declaracionnan haci durante e proceduranan den corte, Van der Sloot a confesa cu el a mata e adolescente riba un beach na Aruba na 2005 y a deshaci di su curpa den lama.
A pesar di e confesion, fiscal no a presenta cargo di asesinato contra dje en conexion cu morto di Holloway.
Actualmente Van der Sloot ta cera den prison na Peru, unda e ta sinta un castigo di 28 aña desde 2012 pa asesinato di studiante Peruano, Stephany Flores. E asesinato a tuma lugar na Lima na 2010, cinco aña despues di desaparicion di Holloway.
Beth Holloway a pasa casi dos decada buscando contesta tocante destino di su yiu. Durante añanan el a biaha ripitidamente pa Aruba, a coopera cu investigadornan y a boga pa proteccion mas fuerte pa persona desaparecido.
E keho nobo na Hulanda ta representa loke su team legal ta describi como su “ultimo caminda legal.”
Pasobra Van der Sloot ta un ciudadano Hulandes, Holloway ta spera cu autoridadnan Hulandes lo por examina si ainda persecucion legal ta posible bao ley criminal Hulandes.
Ainda no ta cla si OM di Hulanda ta bay habri un investigacion nobo.
Prome, fiscalnan mester determina si e caso ta cay bao hurisdiccion Hulandes y sin tin base legal pa presenta cargo despues di asina hopi aña.
Pero hasta sin claridad tocante e posibilidad di un huicio, Holloway a bisa cu e ta continua buscando tur opcion legal posible cu speransa pa trece husticia y responsabilidad.
Casi 20 aña despues cu Natalee Holloway a desaparece durante su biahe di graduacion na Aruba, e caso ta sigui resona internacionalmente y ta keda un di e investigacionnan mas conoci di persona desparecido conecta cu nos isla.
Pa Beth Holloway, e buskeda pa husticia no a termina.
Door di entrega e keho na Hulanda, Beth Holloway ta spera cu e sistema legal ainda por duna un contesta final den un caso cu a tormenta su famia pa casi dos decada.
Potret: Joran van der Sloot siendo entrega na autoridadnan local na Callao, despues di bolbe Peru na 2023, pa sinta su sentencia pa asesinato. Fiscalia Peruano/ AFP.
