Kia (NW) (1).JPG

E biblioteca di prizon KIA ta renoba despues di keda cera pa un aña. Esaki despues un di e trahadonan Harold Koolman a tuma e iniciativa pa un renobacion.

 

Esaki ta informacion for di un relato di KIA:

Sr. Koolman a lidera e proyecto pa cual el a haya e cooperacion di 3 detenido y nan a traha 7 dia pa siman te ora cu nan a keda cla. E proceso di limpiesa, renobacion y reapertura di e biblioteca a tuma menos tempo cu a premira.

 

Sr. Koolman a splica cu e bukinan cu nan tin den e coleccion tabata den e biblioteca caba, y cu nan a haya algun buki como donacion, pero nan ta desea di haya mas buki pa ofrece un seleccion mas grandi na e detenidonan. E ta agrega cu e ta desea di ricibi yudansa di instancianan manera biblioteca nacional pa amplia e coleccion di buki.

 

E biblioteca ta un di e derechonan di e detenidonan. E reunion cu comision di detenido tambe ta un di e puntonan di interes cu ta cumpliendo pa algun tempo caba. Louis Croes, kende tin 27 aña di servicio na KIA, ta e hende di departamento bao di cua e biblioteca ta resorta. E ta splica cu a traha un programa pa e detenidonan cu ta encera un siman pa bishita biblioteca y un siman di pelicula.

 

E interes pa cu e oportunidadnan aki ta creciendo cerca e presonan y nan mes ta motiva otro pa haci uzo di nan. Ainda e detenidonan no tin acceso na Internet, pero si tin computer pa nan por type carta, etc.