(NBCNews)—Paden di murayanan di prison federal Fort Dix na New Jersey, ningun hende ta biba manera prisonero #37452-054. Tin homber cu ta cushina p’e y homber cu ta limpia p’e. Tin homber cu ta drecha su cama y homber cu ta laba su paña. Hasta tin un homber cu ta dun’e masashi estilo Chines.
Asina Sean “Diddy” Combs ta biba den prison, segun cuatro homber cu a pasa tempo den e mesun seccion cu e magnate di hip-hop cay den desgracia. Nan a haya anonimidad pa por papia libremente tocante bida den prison.
E articulo aki tambe ta basa parcialmente riba potret y video tuma paden di prison y revisa pa NBC News. Nan ta inclui imagen di Combs aparentemente usando un telefon contrabanda.
Combs, di 56 aña, ta cumpli un sentencia di 50 luna pa delitonan relaciona cu prostitucion. Pero ainda e ta biba un bida privilegia, e fuentenan a bisa, y no ta solamente pa motibo di e prisoneronan cu ta dispuesto pa haci hasta e tareanan mas basico p’e pa e prijs corecto.
Varios fuente a bisa cu e ta uza celularnan contrabanda pa wak Instagram y mira potret sexualmente explicito cu un ex-pareha ta mand’e. Tambe el a logra cumpra for di otro prisoneronan un remedi antidepresivo busca pa su efecto pa mehora estado di animo—Remeron, of “rem-roms” manera nan ta yama den prison. Durante weekend, frecuentemente e tabata bebe for di un stash secreto di bebida alcoholico premium, cu guardianan tabata contrabanda y cu e tabata comparti cu un grupo chikito di otro prisonero.
E bida privilegia di Combs tras di tralie no ta barata.
El a gasta miles di dollar pa luna pa hiba su estilo di bida den e prison di seguridad abou, fuentenan a bisa, cu placa bayendo for di hendenan pafo di prison pa cuentanan di comisario di e prisoneronan cu ta haci servicionan p’e.
Entre esnan cu Combs ta paga tin un homber cu ta limpia baño prome cu e uza nan, y hombernan cu secretamente ta cushin’e cuminda special—curry chicken, pizza y empanada — usando un elemento di calor improvisa poni den awa, segun e fuentenan.
Tambe tin prisoneronan cu ta warda Combs su telefon y cartanan di fanaticada p’e.
“E ta haya asina tanto,” un di e fuentenan a bisa. “E no tin espacio p’e.”
Un vocero di Combs a minimisa e detayenan tocante su bida den prison.
“E critica continuo di cada detaye comun di bida di Sean Combs den prison a yega na un punto cu media ta presenta bida normal den prison como noticia,” e vocero a bisa. “E unico noticia berdadero ta cu Sean ta sigui cumpli su sentencia mientras e ta warda decision di corte riba su apelacion.”
Potret di AFP.
