Den e simannan nos dilanti henter e asunto di un instruccion di banda di gobierno di Reino ta presenta riba nos atrobe. Ademas acompaña pa e otro decision cu mester tuma den e mesun Conseho di Ministro aki, cu ta concerni e asunto di con restablece supervision financiero riba gobierno di Aruba.

Mientras tanto, gobierno a mustra avance riba otro tereno relaciona, cu ta presupuesto 2020, cu a keda cla. Esaki naturalmente no ta implica cu lo tin un ley di presupuesto aproba y cla pa cumpli cu e terminonan poni den ley di supervision, cu ta bisa cu e ley di presupuesto mester ta aproba pa 15 di december, pa mas tarda. Cu tres siman di tempo pa Raad van Advies haci nan trabao, ta imposible pa cumpli cu e deadline ey caba.

Esey lo no mester ta asina dramatico, mirando e hecho cu e trabao mes ta haci caba, lo por bisa, kizas. Un poco di flexibilidad, berdad, lo no ta malo, sigur unda ta traha den bon ambiente y buscando harmonia, nos lo por bisa. Tur esey ta corecto, pero ora ta papia di esey, no ta conveniente pa papia di un manera menospreciante di e otro partido, y mucho menos di mandatarionan Hulandes, cu ta bastante cuidadoso den nan forma di expresa. Otro caso ta un parlamentario manera Bosman (VVD) cu ta papia tur cos manera e ta haya ta bon. Pero enfin, e no ta un ministro o secretario di estado.

Den e contexto aki no ta saludable pa e relacionnan den Reino cu dado momento un mandatario, den e caso aki ministro interino Raymond Knops, mester contesta pregunta di Tweede Kamer tocante expresion di Prome Ministro di Aruba, cu segun Antilliaans Dagblad lo a bisa cu bo no por sa nunca cu e ministronan Hulandes, pasobra nan no semper ta atene nan mes na ley. Knops ta informa cu el a pidi e mandatario di Aruba pa un splicacion y e contesta tabata cu e corant a refleha su palabranan incorectamente…

Awor, e punto no ta loke e ministro di Aruba a bisa exactamente, ni cu Knops su splicacion ta adecua of no. E punto ta cu no mucho tempo pasa caba, den un carta di premier Rutte cu a sali den publicidad, el a urgi su colega di Aruba pa atende asunto di un manera reserva ora ta trata temanan cu ta maneha den reunion di gobierno di Reino. Ademas el a urgi e colega pa limita su mes na e hechonan den e tipo di comunicacion aki. Den e carta di dialuna na Tweede Kamer ministro Knops ta haya necesario pa informa cu “el a pidi ministro presidente di Aruba pa, sigur si ta relaciona cu Hulanda, den futuro (keda) formula cuidadosamente y pa limita su mes na e hechonan.”

Manera sa bisa na e mesun Hulandes: “Het zal je maar gezegd worden…” Den corto tempo dos biaha ta expresa malcontento cu expresion di nos prome ministro haci pa consumo local y cu un reaccion di banda Hulandes pa tuma hecho na cuenta. Medionan di awendia no tin frontera mas y palabra ta biaha bay tur parti di mundo. Pero esey no ta e unico motibo pa papia cu cautela. Un trato cuidadoso di e otro partido semper ta recomendable, pasobra e bataya mester ta riba e contenido di e asunto, manera den e caso aki e maneho financiero di gobierno di Aruba, unda no sin mas gobierno di Hulanda/Reino y consehero CAft semper tin razon, pero ta mas facil pa haya razon tambe si no tin e tipo di iritacion aki hungando un papel.

Ademas, si nos pasa pa papia di e hechonan encuanto mantene bo mes na ley, nos lo mester tuma na cuenta tambe cu e mandatarionan Hulandes mester a mantene tur loke ta stipula den e ley di supervision financiero di Aruba, cu no ta stipula solamente cu pa 15 di december mester tin un presupuesto aproba, pero ta bisa tambe cu deficit di un cierto aña, cu ta sobrepasa e normanan aproba pa presupuesto y acorda pa gobierno di Reino, mester keda compensa den e aña siguiente (Laft art. 17 inciso 6). Asina leu cu nos ta corda, e deficit grandi di 2017, cu tabata e herencia di gobierno anterior, no mester a keda compensa den presupuesto 2018 o despues. Lo tabata bon pa Hulanda aki tambe exigi cu ta cumpli cu ley ‘al pie de la letra’? Absolutamente cu no, ta nos opinion tambe. Importante ta pa no reconoce so cu den un bon ambiente por yega na acuerdo flexible, pero mester tene na cuenta cu den e caso aki ta Aruba ta e parti supervisa, y e autoridad ta gobierno di Reino, cu ta dicidi si ta bay aplica e ley literalmente o no.

Tur e iritacionnan innecesario aki ta lanta duda si aki menos di dos siman lo tin e ambiente propicio pa gobierno di Aruba sali miho posible for di e situacion actual. Ban spera cu e presupuesto ta solido, cu en todo caso esey no mester bira un issue tambe. No ta necesario perde mas tempo cu cualkier tipo di pleito den banda ki, cu ta kita atencion di e asunto principal. Y cuidao cu palabra pa consumo local.

 

LEAVE A REPLY

Please enter your comment!
Please enter your name here