(AP) — Saudi Arabia kier ayudo di Merca pa desaroya su propio programa nuclear civil, y administracion di Trump ta bisa cu ta “hopi emociona” cu e posibilidad. Cooperacion Mericano-Saudi den construccion di reactor pa planta di energia nuclear den e reino por laga afo e Chines y Rusonan for di loke por bira un partnership di hopi dollar pa e industria nuclear Mericano.
A pesar di e emocion, tin obstaculo, incluyendo miedo cu yuda e Saudinan logra nan deseo di hopi tempo pa enrikece nan propio uranium como parti di e partnership aki lo habri rondanan nobo di proliferacion y competencia nuclear. E buskeda di Saudi Arabia pa un acuerdo nuclear probablemente lo tin un rol den e negociacion cambiante riba asuntonan di seguridad regional involucrando Merca, Iran y Israel.
E siman aki, presidente Republicano, Donald Trump ta haciendo su prome biaha na Saudi Arabia den su di dos termino.
Secretario di Energia, Chris Wright, kende a biaha Saudi Arabia prome cu e biahe di Trump, a bisa cu mundo por spera di mira “desaroyonan significante” e aña aki tocante yuda e reino construi un industria di energia nuclear comercial. Wright a bisa cu Merca ta “hopi emociona” pa esaki.
Esey no ta nifica necesariamente cu ta bay tin logronan grandi durante biahe di Trump, segun Jon Alterman, cabesante di e programa di Medio Oriente na e Centro pa Estudio Strategico y Internacional na Washington. Algo mas chikito cu toch ta señala na e Saudinan y Iraninan – cu ken Trump ta pushando pa un acuerdo limitando e programa nuclear di Tehran – cu Washington ta interesa den coopera cu esfuersonan Saudi por ta e meta di Merca pa awo.
Saudi Arabia ta un gigante di petroleo global, pero tambe ta en gran parti un desierto. Usa tur e airco ey ta usa hopi di e petroleo cu e reino lo prefera di exporta. E propio consumo di petroleo di e Saudinan ta kima hasta un tercera parti di loke e pais ta produci.
Prins heredero Mohammed bin Salman tambe ta pushando pa reforsa mineria di Saudi Arabia y e procesamento di su propio mineralnan. Esey ta inclui reservanan Saudi di uranium, un fuel pa reactor nuclear.
Pa administracion di Trump, cualkier deal cu Iran cu ta permiti Tehran mantene su propio programa nuclear of continua su propio enrikecemento por aumenta presion Saudi pa algo mescos.
Esey maske Saudi Arabia y otro estadonan den Golfo a baha nan enemistad pa cu Iran den añanan recien y ta sosteniendo e esfuersonan di Merca pa limita e programa nuclear di Iran pacificamente.
Pa Merca, cualkier ayudo tecnologico cu duna e Saudinan mientras nan ta move den direccion di construi reactornan nuclear por ta un ganashi pa companianan Mericano.
Internacionalmente, tin sosten pa esfuersonan Mericano pa yega na un acuerdo nuclear cu Saudi Arabia, mirando cu e Saudinan por bay cerca e Chines y Rusonan pa ayudo pa desaroya un industria nuclear, cu menos salvaguardia.
E sentimento ta cu “si Merca no dun’e, otro hende si lo hacie,” segun Hasan Alhasan, un senior fellow na Bahrain pa Instituto Internacional pa Estudio Strategico.
“Sin duda, si Iran desaroya un bom nuclear, nos lo sigui lo mas pronto posible,” prins Mohammed a bisa na 2018, tempo di tension mas halto entre e estadonan Arabe y Iran.
Saudi Arabia y otro estadonan di Golfo ta insisti riba mihor relacion cu Iran y diplomacia pa awo. Pero comentarionan di prins Mohammed – y otro oficialnan Saudi a bisa mescos – a laga habri e posibilidad cu armanan nuclear ta un meta strategico pa e Saudinan.
E Saudinan pa largo a pusha pa Merca construi un facilidad di enrikecemento di uranium den e reino como parti di cualkier acuerdo di cooperacion nuclear entre ambos pais. E facilidad ey por produci low-enriched uranium pa reactornan nuclear civil. Pero sin suficiente control, tambe lo por produci highly-enriched uranium pa bom nuclear.
Oficialnan di administracion di Trump ta cita e deseo di e Saudinan pa haci uso di e depositonan di uranium di nan pais. E reino a gasta decenas di miyones di dollar, cu asistencia Chines, pa haya y desaroya e depositonan aki. Pero e uranium cu a identifica te awo lo ta “severamente anti-economico” pa desaroya, e Agencia di Energia Nuclear intergubernamental ta bisa.
Ta decadas desde cu tabatin cualkier transferencia sanciona pa estado di e sorto di tecnologia ey na un estado sin arma nuclear, maske un red den mercado preto basa na Pakistan a duna tecnologia di enrikecemento na Iran, Nort Korea, Libia y posiblemente otronan como 20 aña pasa, segun Robert Einhorn a nota pa Brookings Institute aña pasa.
Permiti Saudi Arabia – of cualkier otro pais adicional – pa tene un facilidad di enrikecemento lo reverti politica di hopi tempo di Merca. E por impulsa mas proliferacion nuclear entre aliado y rival di Merca, Einhorn ta skirbi.
Bao presidente Democrata, Joe Biden, Merca y Saudi Arabia tabata mira cooperacion nuclear como apenas un parti di negociacionnan mas amplio cu tambe tabata involucra deseo Saudi pa arma y garantia di seguridad Mericano, y pa un acuerdo satisfactorio a largo plaso den nomber di e Palestinonan. Merca, mientras tanto, a mara e cooperacion na e normalisacion di relacion di Saudi Arabia cu Israel.
Administracion di Trump ta parce di a habri un parti di e bundle aki.
Pero e administracion por ainda mira wanta cualkier acuerdo nuclear civil como un bentaha den negocia loke por bira relacionnan diplomatico historico entre e reino y Israel, Alterman a nota.
Yega na e acuerdo ey, parti di loke ta conoci como e Acuerdonan di Abraham entre estadonan Arabe y Israel, ta un meta principal di Trump.
Despues di e biahe di Wright, algun Israeli a expresa nan oposicion contra permiti Saudi Arabia enrikece uranium, y Iran y Saudi Arabia ambos ta observando cautelosamente e combersacionnan di otro cu Merca riba nan asuntonan nuclear.
