Diasabra merdia Aruba a experencia un otro ‘black out’ total, cual a laga varios hende sin coriente pa te cu seis ora largo mientras WEB y ELMAR ta atende e problema. Black outs riba e isla a bira un fenomeno comun recientemente unda a mira al menos 1 blackout total pa cada aña desde 2022. Esaki a causa hopi frustracion entre ciudadanonan, cual ta keda cuestiona e capacidad y maneho di e suministradornan di nos coriente y awa.
Tabata un tiki despues di 12or di merdia ora coriente a cay pa tur hende. Pa 12:38pm, WEB a emiti un aviso inicial riba nan pagina di Facebook, informando cu e caida di coriente tabata debi na un problema cu a haya den varios motor cu a bay for di servicio. Na mesun momento a anuncia cu lo dura aproximadamente cuatro ora pa restaura coriente pa tur. Pero esaki a laga di desea entre ciudadanonan.
Algun comentarionan riba e publicacion inicial a expresa frustracion cu un black out ta sucede net riba un diasabra, ora mayoria ciudadano ta tuma tempo pa descansa of cumpli cu respondinan personal:
“Bai un tiki mas poco poco. Ta diasabra, tin hende cu plannan, graduations na skolnan, eventonan, restaurant cu kier habri pa [g]ana plaka.”
“Echt duna hende mal beisssssssssss riba diasabraaaaa”
Den un entrevista mas despues den dia, CEO di WEB N.V., Alfredo Koolman, a splica cu tabata un situacion lamentable unda “un cadena di eventonan a conduci cu nos tin un black out akinan.” A enfatisa cu e problema no tabata causa pa un falta di maneho, pero cu investigacion ta andando pa haya sa kico precisamente a causa e strobacion den e motornan. A sigui splica cu mester a cambia e combustible di e motornan for di diesel pa HFO, cual a resulta den un proceso mas largo debi cu esaki ta rekeri cuido delicado y stapnan adicional pa por garantisa stabilidad den suministro.
E caida den coriente no a solamente afecta hogarnan, pero tambe operacion na Aeropuerto Internacional Reina Beatrix . Aunke a afirma den un publicacion riba Facebook cu operacion ta continua na e aeropuerto y cu ningun vuelo a ser posponi of cancela, a informa si cu e proceso di check-in tabata canando mas slow. E retraso aki a causa un rij largo pafo di e aeropuerto pa supuestamente controla e fluho di pasahero. 1 ora despues aeropuerto a confirma cu a haya coriente back. Algun turista riba Facebook a comenta cu a dura varios ora pa nan por pasa door di check-in y inmigracion.
Ademas, otro turistanan a comenta riba e strobacion den coriente cu tambe a afecta hotelnan, unda a reporta riba Facebook cu algun mester a warda tres ora pa por haya coriente back.
Pa 1:35pm, ELMAR N.V. a anuncia cu lo cuminsa suministra coriente back na areanan afecta. E prome areanan pa haya coriente back tabata Santa Cruz y un parti di Pos Chiquito. Algun comentario riba Facebook a nota cu cierto area a experencia un otro caida di coriente, incluyendo Noord y Rooi Afo, cual a ser atribui na un otro motor cu a ‘trip’. Casi 5 ora despues, rond di 6or di atardi, ELMAR y WEB ambos a confirma suministro completo pa henter Aruba.
Prome cu esaki, e ultimo black out total pa sucede na Aruba tabata januari 2024.
