Blackout ocasiona pa turbina conecta, pero no den operacion

Manera ta conoci, diadomingo henter Aruba tabata estado black out. WEB Aruba a duna un conferencia di prensa pa splica kico exactamente a pasa y dicon esaki a dura hopi pa por a resolve.

Director Luis Oduber, prome cu a cuminsa cu splicacion, a duna un disculpa pa comunidad di Aruba pa e suceso. E ta bisa cu por a sumistra coriente na algun bario trempan, anochi y te madruga a logra reestablece completo.

Pa atardi 5:18 a experiencia e ‘storing’ na central, Unda cu e boiler cu ta pusha aire a trip. E ta remarca cu eynan a perde balans na central, cu consecuencia cu operador a reacciona y benta ‘load’ carga afo. E ta splica Elmar 1, 2 y 3 a saca di servicio, pa asina purba stabilisa e produccion prome, y wak kico a sosode, pa purba suministra e coriente.

No a logra identifica conforme e procedura. Prome cos cu nan ta haci den fayo asina ta isola e problema. “Un boiler a trip y turbina 6 tambe. El a saca nos sistema for di balans. Pa 7or nos a perde full powerhouse y 7:15 un total black out. Akiden tur cos a bay down. Solamente luz cendi na central di WEB.”

Ora a wak unda e fayo ta, no a logra identifica nada. A pone e motor start pa casi 8or di anochi, cu algun bario a haya coriente. Den caso asina, ta suministra coriente pa bario chikito y mas cerca di WEB prome, pa asina sigui bay pa e siguiente barionan.

Manera a cuminsa yega mas ariba, a experiencia otro black out, y pa 9or di anochi a identifica unda e fayo tabata encera. E tabata un ‘lighting arrester’ na un di transformernan di ekipo di turbina di emergencia.

E sistema no a isola, e parti dificil cu no por identifica e problema, segun e director, ta cu e gas di turbina tabata conecta, pero no den operacion. E transformer ta cu energia, pero e gas di turbina ta produci coriente na e momento ey, anto pa algun motibo no a pensa cu por tin fayo den dje, of algun ekipo conecta na dje. Unabes a haya sa, e sistema a wordo isola.

A cuminsa traha cu esaki yamando tecnico pa asina yega na drecha e problema, y pa casi 5or di madruga a suministra coriente na Aruba, ‘e manera sigur y confiabel’. Segun cartual otro aña lo tin motor nobo den servicio. Turbina y boiler lo ta fuera di servicio, cu capacidad cu por duna mas energia y miho demanda.

Sr. Oduber ta menciona cu e fayo nan aki ta fastioso, pero den caso asina mester wak henter e sistema pa wak unda problema ta. “Mester busca y drenta den area unda cu hende no ta drenta pa identifica e fayo. Si e gas di turbina tabata den operacion, por a identifica di biaha.”

Richard Frank, manager di asuntonan tecnico operacional, a splica cu tur inversion cu a hinca den sistema ta yuda cu ‘troubleshooting’ mas lihe. Sinembargo, e tipo di fayo ta scondi door cu aparato no ta riba liña.

Sr. Frank a splica cu un ‘lighting arrester’ ta un ‘bliksem afleider’, un sistema cu ta stop e bliksem si e dal den e transformer en bes di kima, e ta pasa ground di biaha. E conexion cu supuestamente ta no conecta, e ta conecta ora cu bliksem dal, e ta cera anto e voltahe ta bay den sistema y coriente ta bay ground.