Te ainda e sindicatonan di sector publico (SIMAR, SEPPA, TOPA, SPA y SADA) ta wardado un contra proposicion di gobierno riba nan solicitud di pago di indexering pa compensa e perdida di poder di compra.

Ayera un biaha mas, vocero di e grupo sindical aki y presidente di SADA, Edward Maduro, a bolbe recorda gobierno cu ainda nan ta na spera di nan contra proposicion aki por escrito riba nan proposicion di 20 di juni ultimo. E bloke sindical a dicidi di bin cu un ultimatum. Nan a duda te dia 9 di augustus venidero pa gobierno bin cu un contra proposicion pa nan por discuti riba indexering.

Maduro a splica cu 2013 tabata e ultimo aña cu gobierno a duna indexering. Pero na 2014 nan a firma un protocol cu e gobierno anterior, na unda cu nan a acorda pa bin cu mecanismo pa cuminsa cu indexering for di 1 di januari 2019.

Igualmente Maduro den nomber di e bloke sindical aki a cuestiona e echo cu minister di Finansa y Economia a divulga via social media, cu e sindicatonan aki no tin boluntad pa institui un comision pa traha riba indexering,y pa nan busca un solucion satisfactorio pa tur partido envolvi.

“Nos ta haya esaki hopi lamentabel pasobra esaki no ta cuadra cu e realidad”, e sindicalista Maduro a declara. Segun Maduro, semper e bloke sindical aki a mustra su boluntad den tur reunion cu nan a sostene.

For di april ultimo e sindicatonan reuni seis biaha cu gobierno. Den e prome reunion di 8 di april, e sindicatonan a indica gobierno riba e comision cu mester bin pa trata e mecanismo di indexering.

Pero e tempo aya e sindicatonan a bisa gobierno cu nan kier trata e tema di indexering 2019 apart. Ya cu si dado caso nan ta bay institui un comision, e lo trece un tardansa y nunca nan lo por keda cla cu e discusion di indexering pa wordo hinca na tempo den e presupuesto venidero.

Den e reunion ey nan no a conta cu presencia di minister di Finansa y Economia, pero si cu minister presidente, caminda gobierno a bay di acuerdo pa mantene e plataforma aki y no un comision pa trata e tema di indexering 2019.

Pero si nan a keda pendiente pa e proximo biaha bin cu un comision pa trata riba indexering di 2020 y den futuro. E sindicatonan ta pro pa bin cu un comision pa evita discusion den futuro. Pero e comision aki mester traha pa e indexering di 2020 y den futuro; y no pa esun di 2019.

E recordatorio aki ta tuma luga un siman despues cu e sindicatonan a tene e otro conferencia di prensa, caminda nan a anuncia cu e dia ey lo manda un carta breve pa gobierno. Den e carta ey di dia 9 di juli ultimo, nan ta bisa gobierno cu nan no ta dunando clarificacion preto riba blanco rond di e tema di indexering.

E sindicatonan aki ta spera cu prome cu e fecha limite di dia 9 di augustus awor vence, nan por ricibi nan contra proposicion for di gobierno. Nan ta haya cu ainda tin espacio pa por negosha e suma di indexering pa esaki wordo hinca den e presupuesto 2019 prome cu 1 di september proximo.

 

LEAVE A REPLY

Please enter your comment!
Please enter your name here