Ainda no tin detaye di e resultado di e reunion di diabierna ultimo cu gobierno a sostene cu e bloke di cinco sindicato di e sector publico (SEPPA, SADA, TOPA, SIMAR, SPA) tocante indexering.

Un reunion cu e bloke sindical a considera crucial, ya cu e siman aki nan lo tene un reunion cu nan miembro y no miembro, practicamente cu henter e cuerpo di ambtenaar na servicio di gobierno. Un reunion cu seguramente lo paralisa e servicio y operacion di e aparato gubernamental, dependiendo di e ora cu lo tuma luga y con largo e lo dura.

Vocero di e bloke sindical, Edward Maduro a bisa cu na su momento lo laga sa ki dia y ora cu e sindicatonan lo reuni cu nan respectivo miembronan y personal di gobierno. E posicion di sindicato ta cu gobierno mester cumpli cu e protocol cu nan tin firma. E ta haya cu si nan intencion tabata di no cumpli cu ne, tabata mas na su luga y mas respetuoso pa gobierno por a laga sa e sindicatonan for di principio cu nan no lo tene cuenta cu e protocol aki.

Encuanto si ta necesario pa gobierno hiba e discusion aki na nivel di Reino pa interveni y cumpli cu nan exigencia, Maduro a bisa cu e no sa si esaki ta posibel of no. “Pero atrobe, a nos ta deal cu gobierno,” el a bisa. Maduro a declara cu mester tene cuenta cu gobierno ta un dunado di trabou. Mientras cu sindicato como representante di e trahado ta bay cerca e dunado di trabou.

“Si Reino ta dunado di trabou na Aruba, nos ta bay cerca Reino…” el a bisa. Sinembargo den e caso aki, gobierno di Aruba ta e dunado di trabou di e ambtenaar, y nan como sindicato ta representa e ambtenaar pa negosha y deal cu gobierno pa e trahadonan.

Restructuracion.
Encuanto si como sindicatonan di e ambtenaar nan ta dispuesto pa colabora cu restructuracion di e aparato publico pa mantene esaki mas pagabel, Maduro ta haya cu e palabra ‘boluntad’ ta algo crucial pa gobierno.

Sinembargo internamente nan no a yega di trata e asunto aki niun biaha, ya cu esaki ta prerogativo di gobierno como dunado di trabou. Gobierno ta esun cu mester wak con e ta deal cu su maneho di personal y busca e motibo pa kico e gasto di personal a subi, y no ‘ban coge un machete y cuminsa pasa’

E no kier a bay den e tema aki, sino cu nan lo kier pone atencion riba e tema di indexering. Ademas tin un comision cu mester wordo forma. Si gobierno kier trece e asunto aki como un tema pa trata esaki den un of otro manera, e mester bin den e comision cu gobierno mester forma. Y ainda esaki no a sosode.

 

 

 

LEAVE A REPLY

Please enter your comment!
Please enter your name here