Ayera un sondeo a mustra contaminacion di azeta for di e punto mas halto di Aruba na parti di Westpunt yegando te na Boca Grandi y casi tur e bocanan. Gobierno ta papia di tarballs. Na Boca Druif, Boca di Pos, Boca Chikito, Wari Ruri, Budui, Boca Mahos y Natural Bridge, Daimari, Dos Playa, Boca Prins, Boca di Brasa, Rincon y Boca Grandi a haya algun mancha.
Personal di diferente instancianan di gobierno, companianan estatal y boluntarionan di entre otro NGO’s a cuminsa limpia e beachnan afecta for di ayera mainta. Prome minister Mike Eman ta informa ayera tardi cu: ‘te ainda no a detecta ningun parha of otro bestia morto a causa di e oil spill, hunto cu NGO local ta monitor e situacion na e rifnan caminda Bubinan ta pone webo y por ultimo’.
Kimiconan dañino pa hende y naturalesa
Tambe el a declara e bocanan cera pa publica y ta duna un conseho negativo pa local y turista pa landa. Gobierno ta informa cu durante e sondeo haci dialuna mainta na Boca Prins, a constata cu, manera informacion comparti door di Boneiro ta bisa, e patches ta contene un cantidad di petroleo y otro kimiconan cu ta dañino pa hende y naturalesa. Funcionarionan di Departamento di Naturalesa y Ambiente a tuma muestranan cu lo laga analisa detayadamente pa determina kico tur tin den dje y cu kico mester tene cuenta.
Nan a haci sondeonan tambe di e rifnan dilanti di costa zuid di Aruba caminda den e periodo actual e parha Boebi ta bin pone su webonan. Segun calculo di Aruba Birdlife Conservation, un 30 mil parha di e specie aki ta yega Aruba pa pone webo tur aña. Te ainda e rifnan ta liber di patches.
Director interino di Rampenbureau, Rino Hermans ta spera cu den termino di 1 pa 2 siman, tur trabou di limpiesa ta cla. E barancanan lo tin mester di atencion adicional si, pero a sigura cu tur boca cu tin beach ta habri bek pa publico den termino corto, segun e. Tambe hunto cu Servicio Meteorologico y coleganan na Boneiro ta mira con e situacion ta cana pa asina ta prepara pa cualke eventualidad adicional. Ta keda hopi pendiente pa anticipa si acaso e stroom por cambia y e derame ta yega na e beachnan turistico na costa zuid pa por atende cu esey inmediatamente, asina sr. Hermans ta splica.
Informacion pa boluntario
Riba website di Parke Nacional lo tin informacion pa e boluntarionan cu lo kier yuda , como tambe informacion riba con pa cuida na momento cu bo dicidi pa bay yuda. Tambe por yama 585 -1234. Aruba Birdlife Conservation tambe a haci un yamada pa boluntarionan den caso lo haya parhanan afecta. Por yama na e mesun number pa registra.
