E aña aki riba 15 y 16 di maart Aruba Doet t’ey back pa su di 12 edicion. CEDE Aruba den cooperacion cu Oranje Fonds ta organisa Aruba Doet, e accion boluntario di mas grandi na Aruba.
Aruba Doet a cuminsa na aña 2013 y e aña aki nan ta celebra nan di 12 aña consecutivo cu nan ta organisa e gran actividad aki. Aña pa aña e actividad boluntario aki a crece bira mas grandi y e aña aki nan tin un total di 172 proyecto cu e boluntarionan por scoge pa participa den dje.
Actualmente tur proyecto cu ta forma parti di Aruba Doet 2024 cu ta buscando e aporte di boluntarionan, ta visibel ariba nan website pa asina tur esnan cu ta interesa di aporta na e diferente causanan cu Aruba Doet ta sostene por registra.
For di e total di 172 proyecto cu Aruba Doet ta aporta na dje e aña aki, boluntarionan interesa por scoge entre proyectonan di verf, embeyecemento di un hardin of un scol, yuda na un animal shelter of yuda cu un actividad social cu e adultonan mayor of esun nan mas vulnerabel den comunidad.
Cu Aruba Doet, CEDE Aruba y Oranje Fonds ta demostra con importante ciudadanonan activo ta pa comunidad. Banda di esey Auba Doet ta aporta na e bon imagen di trabao boluntario y ta ilustra con dushi esaki por ta.
