ORANJESTAD – Recientemente a tuma luga e prome “Torneo Alvin A. Howell” di Ahedrez (Schaak), cual a haya un bon acogida.
E torneo tabata specialmente pa hobennan te cu 16 aña di edad y lo wordo teni anualmente den luna di maart, cual por cierto ta e luna cu Alvin Howell ta cumpli aña. E aña aki tabatin un total di 16 hungado inscribi.
Alvin Howell ta hunga ahedrez fo’i aña 1971 y a sa di representa Aruba den pasado dignamente riba nivel internacional. Tambe el a yega di fungi como presidente di e Club di Ahedrez Aruba. Su meta cardinal ta pa stimula e hobennan pa hunga ahedrez.
Up Town Awards a sponsor e premionan y parlamentario Alan Howell tabatin e honor pa entrega e ganadonan nan premio bon mereci. Alvin a yama danki na e presidente y miembronan di e club di Ahedrez Aruba pa e sosten di semper pa cu su persona. Tambe el a gradici Octavio Croes cu a pone su mes disponibel pa ta e arbitro di e torneo.
Prome luga a bay pa Jayden Dirks, segundo luga pa John Tromp y tercer luga pa Leslie Cielo. E hungado cu a progresa mas den rating a keda den nomber di Samantha Aponte. Palabranan di pabien na Alvin Howell y na tur e ganadoranan.
