“Nunca mi lo a pensa cu mi lo keda traha aki asina hopi tempo. Pero e ta mi baby, mi no por bandon’e.”
Na palabra ta Marijke Croes di nos departamento di benta, cu a cuminsa traha na e inicio di Bon Dia Aruba 25 aña pasa. Ora bo ta puntra Marijke pa conta un tiki di e historia di nos compania, un smile grandi ta aparece riba su cara.
Tin hopi mas storia bunita y interesante; e storia patras di e compania, di nos otro empleadonan, partnernan y tambe di nos lesadonan y clientenan. Tur lo sali den un publicacion special na april. Un edicion plata, di 32 pagina full color.
Nos kier mustra tambe cu Bon Dia Aruba tambe tin bista riba e futuro. Nos ta sigui desaroyo, adapta y inventa. P’esey e celebracion ta encera mas: 25 aña di Aruba Today, e lansamento di Buenos Dias Aruba un aña pasa y nos plataforma digital Bon Dia 24.
Bon Dia Aruba semper ta duna espacio pa otro opinion. Nos ta auto critico. Pues den edicion special por haya entrevistanan cu lidernan di e fraccionnan presente. Kico nan ta haya di nos corant, pero tambe nan bista riba e importancia di transparencia den nos democracia, libertad di prensa y ki rol Bon Dia Aruba por hunga.
Di floppy disk pa e prome camara digital
Tambe tin hopi storia cu tin di haber cu e desaroyonan tecnico cu su efectonan riba e trabao. Por ehempel e storia di sr. Edwin Jacobs: semper el a mantene un relacion masha estrecho cu Bon Dia Aruba, prome como politico, y awor como director di Banco di Seguro Social (SVb). Na aña 1997, Bon Dia Aruba a bira su prome contacto cu prensa na Aruba. Ainda e ta corda e epoca ey. Tur diadomingo e tabata cana drenta den Bon Dia Aruba cu su floppy disk… E tabata “epoca hopi diferente” cu locual awendia, el a bisa.
Y e storia di e fotografo Pedro ‘Famous’ Diaz, un fotografo cu ta gusta innovacion y tecnologia. E tabata e prome fotografo di prensa na Aruba cu a haci uzo di un camara digital, tempo cu el a cuminsa traha cu Bon Dia Aruba. E tabata un camara cu Apple cu a wordo fabrica hunto cu Kodak bou e nomber Quick Take 100.
Pero tambe tin storia interno di hefe di Pre-press Luis Fernando Arenas; dia 9 di april 1992 el a cuminsa traha den Bon Dia Aruba. E tempo aya e proceso tabata completamente manual. Full e proceso di Pre-press tabata demanda 7 ora di trabou den situacion normal. Si tabatin algun eror te hasta mas… Awendia y danki na inversion haci den ekipo moderno e proceso aki ta wordo realisa den 2 pa 3 ora cu miho calidad.
Bo compania
Nos kier gradici tur cu a sostene Bon Dia Aruba den un of otro forma. Tambe nos kier informa cu esunnan cu ta interesa pa participa den e edicion special, lo por tuma contacto cu nos (582-7800 of aviso@bondia.com).
E edicion ta duna bo compania atencion den un forma nobo exclusivo. Unda bo por presenta bo compania y producto na e mercado local y simultaneamente participa den nos celebracion. Tambe por pidi pa un periodista pa traha un articulo cu ta duna un perspectiva original riba bo compania. Den un forma cu sigur lo ta atrae mas lesado.
Nos lo uza e edicion special durante e celebracion henter aña, pues den nos eventonan y otro actividad. Tambe nos lo publica e edicion riba www.bondia24.com.
Masha danki pa bo atencion y spera cu nos por conta riba bo sosten den futuro,
Saludo cordial di e team di
Bon Dia Aruba, Aruba Today, Buenos Dias Aruba y Bon Dia 24.
