Bon Gobernacion den… Rumbo robez caba…?

No a tarda pa surgi controversia politico den e temanan relaciona cu cambio di gobierno, cu atrobe ta mustra un manera deficiente di maneho. Diferente tema ta lucha pa atencion den e sentido aki. Por ehemplo, e storia interminable di nombramento di ministro cu no a tuma lugar ainda. E candidato ministerial pa cartera di infrastructura, energia y telecomunicacion, a hiba su caso corte, den un intento pa contradeci contenido di e informe cu servicio di impuesto a elabora pa e ocasion. Mester tene na vista cu e bataya den corte, irespecto eventual veredicto of no, finalmente no ta decisivo pa e nombramento. Manera nos a opina caba den un reciente editorial (di 17 april 2025), e decision di nombramento di tur ministro no ta asunto ni di gobierno actual, ni di Gobernador. Evaluacion final y nombramento ta di gobierno Hulandes. Segun nos Constitucion nos tin un gobierno cu ta consisti di Rey y e ministronan; Gobernador ta reemplazante di Rey y no tin e poder di nombramento. Mientras tanto, e informe disputa di impuesto a bay caba pa Promer Ministro y Gobernador, pues disputa e contenido cu e servicio gubernamental den corte no tin tanto sentido, tambe pasobra huez den e caso entabla, dependiendo di e demanda haci, no ta bay ordena Gobernador ni Rey pa tuma cierto paso den nombramento di e persona.Ademas, por tin otro consideracion cu gobierno Hulandes ta tuma na cuenta den nan evaluacion di e persona, cu tabatin un carera caba como ministro, entre nan e cartera sumamente desastroso como ministro encarga cu finanzas. Sin embargo, esaki no ta motibo pa tarda di e manera aki cu tuma un decision, pa tera o pa lama, den e asunto aki. E candidato y pueblo tin derecho riba un decision pronto, pero cu no necesariamente lo cay na fabor di e candidato.

Otro asunto ta e sucesonan alrededor di retiro y nombramento di miembro di directiva o hunta di comisario den e entidadnan estatal o semi-estatal. Ta remarcable cu e grito o suplica pa practica bon gobernacion den e proceso aki ta surgi exactamente den e epoca aki den voz di e mesun politiconan, cu tempo cu nan ta na mando di e pais nos tabata tende masha poco mes y mira menos ainda di e bon practica gubernamental y transparencia cu awor ta exigi di otro. Pregunta clave: pakico nos mester huzga ken tin razon den e disputa si nos ni remotamente tin un idea ki maneho a hiba durante e anterior gabinete? No ta publica nada, cuenta anual ta parce e di tantisimo secreto gubernamental; ta con por pensa cu un persona normal tin informacion adecua pa opina ta ken mester keda y ken mester bay? Ademas, no ta nan tur te awe a practica e formula unda tur hende liga na e anterior gobierno mester bay y ta nombra un equipo completo cu ta di agrado di e gobierno entrante? Nos no tin ningun indicacion cu ta bin un cambio den e maneho di secretismo y politizacion di dirigencia empresarial aki. Tin voz cu ta papia di un propuesta di ley pa un codigo di bon gobernacion cu lo ta “na caminda” pero pakico e “caminda” ey mester ta asina largo? Si ta asina importante e ley ta, pakico no a termina e trabao ey durante gobernacion di 7 aña? Lo unico cu bo por mira como bon observador ta cu, mientras ta grita di ambos banda, y ta acusa otro di e mesun fayonan, no tin cambio sustancial den e forma di goberna.E punto importante pa tene na vista no ta solamente con ta anda cu derecho di dirigente cu ta baycu e gobierno cu a nombra nan, pero con durante henter e periodo di gobernacion a anda cu principio di bon gobernacion y, mes importante, transparencia pa henter comunidad. Nos lo ta pendiente di con esaki lo continua.

Otro asunto sorprendente ta e aparente suspension di e evaluacion di mercado laboral cu e departamento DPL mester duna, segun Ordenanza di Admision y Expulsion, pa cada peticion di permiso di estadia cu ta concerni trabao.Pa cuminza, ora un mandatario ta dicidi, loke ta parce e caso, di suspende un parti obligatorio di ley, manera e conseho laboral aki, lo menos cu e tan alaba transparencia ta requeri ta cu ta cana e caminda legal pa esaki. Si ta aludi na un urgencia pa tramita un retraso grandi di peticion pa permiso, esaki tabata e caso na varios ocasion den pasado y no ta trata di un situacion unico cu ta hustifica pone ley un banda. Ademas, si acaso circunstancia ta efectivamente hustifica pone parti di ley un banda, lo ta normal pa stipula y menciona publicamente un periodo pa esaki. Si no haci esey, anto aplica o no aplica e requisito di e conseho laboral ta bira algo cu e mandatario por dicidi, segun su propio criterio, loke lo bira un maneho totalmente arbitrario. Den e sentido aki e actual mandatario encarga cu husticia tin algun asunto pa splica.

Sin embargo, ta parce cu pa di tantisimo vez e asunto ta tuma lugar den e escondite gubernamental unda publico no tin acceso; te ey e afamado ‘transparencia’ ta yega y apenas nos ta bibando e promer lunanan di e gobierno aki.Si di berdad e gobierno nobo ta desea di haci un diferencia positivo, esaki no por tuma lugar den forma di lanza lema den publicidad, sino a traves di kibra ‘de una vez por todas’ cu cierto practica inaceptable, cu tur antecesor tambe a practica.