Despues di un tumultuoso reunion informativo den parlamento tocante e propuesta di ley di Reino pa supervision financiero di Aruba, esnan cu a sigui e reunion lo a keda desapunta pa e nivel informativo, si acaso por a papia di esey mes. No por straña ningun hende anto cu e reunion a keda suspendi, te proximo aviso, pa asina pone fin na e ambiente bochinchero cu no tabata sirbi ningun proposito. Sin embargo, e sesion a mustra algun detaye interesante cu ta indica cu e propuesta di ley tin un caminda largo pa bay ainda, promer cu ultimo palabra ta bisa. Di mes esey ta asina pasobra e propuesta definitivo mester core henter e proceso ainda di presentacion na Raad van Advies pa nan conseho, pa despues bin parlamento pa debate y votacion riba e propuesta.
E elemento mas sorpresivo tabata e intervencion di e parlamentario di banda gubernamental cu a expresa abiertamente su rechazo pa e propuesta. Si esaki keda asina, e lo pone extra presion riba e gabinete, cu di mes no por conta cu un base amplio parlamentario. Lamentablemente no por a scucha argumento valido di contenido di su parti; mas bien el a destaca pa su expresion di amor patrio, loke riba su mes ta bon, pero esey ta conta pa tur ciudadano y no ta tanto relevante den debate entre e 21 personanan cu pueblo a eligi pa papia y dicidi na nan nomber.Ironicamente ta trata di e persona cu como ministro di finanzas tabata directamente responsable pa e maneho financiero pesimo cu a conduci na e intervencion Hulandes den nos finanzas. Cu e no ta na fabor di un ley di supervision Hulandes ta di comprende anto. A proposito, ta bon pa menciona cu nos a haya e impresion cu definitivamente e fase den cual tabata pensa ainda riba su eventual regreso como ministro, lo a termina. En todo caso e problema interno aki ta keda representa un riesgo pa e coalicion y no solamente pa e asunto di e ley di supervision.
Pero e asunto mas intrigante cu e reunion a produci ta kico realmente e banda opositor ta rechaza den e propuesta, manera presenta pa e gabinete actual cu a continua e trabao di consulta huridicocu a inicia bao di e actual opositor. Asina leu cu nos conocimento ta yega, no tabatin cambio den e equipo di funcionario publico cu a haci e trabao pa ambos gabinete, y cu tin hunto y individualmente un amplio reconocimento pa nan experiencia y profesionalismo. Di e banda ey no por tin critica, ni riba nan ni riba e gobierno cu a elegi nan pa haci e trabao. Siquiera esey nos tabatin bon regla. Pero, no mester ta asina dificil anto pa indica bon cla cual ta e partinan den e propuesta cu e ex-gobernantenan, actualmente parlamentario atrobe, no ta reconoce como nan aporte y cu lo nan kier mira diferente. No mester lubida cu e modelo ‘hibrido’ di dos ley di supervision tabata nan proposicion. Nos no ta yega ainda na e conclusion cu nan no por indica nos esey, pa por debati cu franqueza y honestidad riba eley. Por lo pronto mester constata cu a keda pega den e contradiccion cu, di un banda ta rechaza e propuesta, supestamente den su totalidad, pasobra e lo ta significa ‘fin di nos autonomia’, mientras cu di otro banda a coopera den creacion di e solucion aki pa e supervision. Un rechazo total di e propuesta ta crea e impresion cu a fingi anto un colaboracion cu Hulanda, a sabiendas cu finalmente lo a yega na e rechazo tal?Esaki realmente ta yama e siguiente pregunta: con tin pensa di colabora den cualkier asunto den Reino, si e cambiodi posicion sorpresivo aki ta loke ta mira? Claro cu nos lo por scucha e argumento cu e partido social democrata semper tabata contra e intervencion Hulandes y a keda demostra esey a traves di e añanan nos tras. Esey sigur ta berdad, y tambe ta berdad cu nan no ta carga e mayor parti di culpa di e debe acumula na 2015. Sin embargo, no por desmenti tampoco cu na dado momento nan tambe mester a acepta e realidad di e supervision y cu a bira dificil evadi e exigencianan Hulandes, a base di nan propio erornan cometi den nan intento di saca supervision di Reino for di e ley di Aruba na 2019. E insistencia Hulandes pa bin cu un ley di Reino tabatin su origen den e hazaña fracasa ey, banda di e afan Hulandes di kier tin tur cos den Reino regla di manera uniforme; ta pesey pa gran parti a copia e supervision di e version original di Corsou y Sint Maarten. Aruba por a bien keda cu su version particular di e ley di supervision,si no a busca problema cu Hulanda na 2019; esey ta core pa cuenta di e partido social democrata.
Finalmente, algo tocante e nivel di informacion cu nos mester por a spera den e caso aki. Nos no ta impresiona cu e informacion duna te awor di banda gubernamental, ni tampoco cu e gritonan emocional di oposicion, sin cu realmente nos ta tende argumento sustancial. Bisa cu un profesor Hulandes a bisa cu e ley no ta bon no ta un argumento, sigur no den un ambiente di supuesto orguyo vernaculo.Ademas, manera nos a publica anteriormente, cu o sin ley di Reino, supervision financiero ta parti di nos realidad, sigur si no ta logra e reformananainda pendiente den finanzas publico.
