Booshi Wever di UPP: E “paniekvoetbal” di coalicion mepRAIZ di awe cu nos por a mira lo desgracia nos pueblo mas ainda

E conferencia di prensa di awe, duna door di ministernan Maduro y Arends, den presencia di e coleganan minister cu ta na Aruba, ta confirma cu den menos di un siman, e gobierno actual ta dunando su mes un “brevet van onvermogen” pa di dos biaha. Si siman pasa ora a bay splica den Parlamento e mensahe di Hulanda pa loke ta e ley di LNT y djey e posicion di gobierno di Reino pa no ta trata e deseo di Aruba pa duna bek e 5%, awe nos por mira cu e resultado di e reunion na Hulanda y e movecion cu gobierno di Aruba ta haci, ta hiba nos directamente den e gara total di Hulanda. Un gobierno cu a demostra di NO TIN “DAADKRACHT”.

E gabinete MEPraiz y hunto cu nan e Parlamento, a bin ta demostra un incapacidad enorme pa loke ta gobernacion y na mes momento ta prefera bay den direccion di confrontacion directo cu Hulanda envez di trata na busca un UNION aki na Aruba, pa hunto nos sali for di e situacion cu nos pais ta pasando aden.

Siman pasa mi a mustra cu e unico opcion pa Aruba tabata (desde 2014), ta (actualmente) y lo ta (si mester bin un eleccion), un Gabinete di Nacional di Crisis (zaken of takenkabinet)! Un gabinete consistiendo di expertonan y no-politiconan. Mi no ta kere cu un eleccion prematuro lo ta na su lugar awor aki, mirando e circumstancianan cu nos ta aden. Un eleccion awor aki lo paralisa nos pais atrobe pa mas di mitar aña, mientras nos tin un Hulanda cu ta poneniendo hopi presion riba Aruba y e pueblo. Anto ta bin acerca un debe astronomico di pais Aruba, un situacion financiero caotico y un situacion economico debil. Tur esaki lo hiba nos mas leu di cas ainda. Anto tur esaki den un ambiente super polarisante y di un situacion di “politieke verziektheid” entre geel cu berde.

Pesey siman pasa den mi comunicado mi a bisa cu e solucion di Aruba ta na e momentonan aki pa bin cu un frente nacional, un union nacional, pa di e forma ey bin cu un “zakenkabinet”. E ministernan actual lo mester tuma nan retiro y bay Parlamento como representante di pueblo, mirando cu ta nan tin mayoria voto. Y asina Parlamento completo apunta un Gabinete Nacional cu no ta existi di politiconan, cu tareanan fiho y defini, pa asina saca Aruba for di e situacion cu e ta den.

Awe atrobe den Parlamento nos por scucha di ambos banda, tiramento di lodo contra otro (e mesun “politieke” verziektheid) y despues di lastra otro y tilda otro, ta pidi pa union pa asina nos sali pa nos pais. Pero loke realmente ta resalta, ta cu no tin e boluntad ey, y asina restaura di berdad e confianza cerca pueblo y cerca gobierno Hulandes.

Hopi ta esnan cu ta haya cu mi ta zeur hopi, pero PAKICO UN “ZAKENKABINET”??? Esaki ta sirbi simplemente como un “cooling off period” pa asina Aruba haya e oxigeno necesario pa por sali y “move on” for di nos problemanan. Un bida nobo, na unda lo tin un scala di reglanan pa Aruba por ser goberna drechi. Na varios ocacion y ultimo na 2020 UPP a propone pa e gabinete nacional aki traha riba e.o.:

1. Percura pa a corto plazo introduci TUR reglanan estricto di Bon Gobernacion. Manera UPP ta bisa tur ora: “Mara mannan di e politiconan”!

2. Fortifica nos organonan di conseho,control etc.

3. Reduci inmediatamente e gastonan di e aparato gubernamental y bin cu un reforma di e aparato basa riba uno moderno y eficiente (y no grandi).

4. Un “personeelstop” per direct, y percura pa nombracionnan necesario y /o promocionnan ta ser haci dor di un comision independiente.

5. Tambe ta di transcendental importancia pa trece cambionan den nos leynan electoral y di financiamento di partidonan politico.

6. “Last but surely not least” mester bin cu un Comision Nacional den un Dialogo Nacional pa delibera riba exigencianan/condicionnan cu Hulanda a bin cune, y enfrenta Hulanda den un union.

Nos ta convenci cu esaki ta e unico manera pa nos por para e tendencianan di ultimo añanan pa torno na nos Status Aparte. Di e manera aki nos ta trece e confiansa bek den Reino y alabes obliga Hulanda pa cumpli cu loke Statuut di Reino ta provee y respeta nos derecho inalienabel di autodeterminacion.

Aruba no ta wordo sirbi na e momentonan aki cu ni un actuacion eratico y lunatico di e gabinete MEPraiz, ni tampoco pa e grito cu tin pa un eleccion adelanta!