(AP)—Un flotilla di barco a sali for di Barcelona pa e Franha di Gaza diadomingo cu ayudo humanitario, activista y celebridadnan abordo buscando pa kibra e blokea Israeli di e teritorio Palestino.
Esaki ta bin mientras Israel a aumenta su ofensiva riba Ciudad di Gaza, limitando entrega di cuminda y material basico den e parti norte di e teritorio Palestino. Expertonan di alimento a adverti na comienso di luna cu e ciudad tabata den hambruna y mita miyon hende den e franha ta enfrentando nivelnan di hamber catastrofico.
E Global Sumud Flotilla ta cargando cuminsa, awa y medicina. Activistanan abordo a demanda un ruta sigur pa entrega e ayudo necesario y e reapertura di un ruta marino humanitario, segun un declaracion. E guera di casi 23 luna a resulta den mas cu 63.000 hende morto, unda al menos 332 Palestino ta muriendo di desnutricion, incluyendo 125 mucha, segun e ministerio di Salud na Gaza.
E convoy maritimo di aproximadamente 20 boto y delegacionnan for di 44 pais ta e intento mas grandi te awor pa kibra e blokeo Israel di e Franha di Gaza via lama, cual awor a dura 18 aña. nan lo ser uni pa mas boto for di wafnan na Italia, Grecia y Tunisia den e proximo dianan, riba e ruta for di e costa occidental di e Mediteraneo pa e Franha di Gaza, e organisadornan a bisa.
Miles sostenedor a reuni na e pier na Barcelona, algun bistiendo Kaffiyeh y cantando “Libera Palestina!” y “Boycott Israel!” Un variacion di boto, tur cu bandera di Palestina, tabata wardando pa desembarca, for di yatenan bieu pa botonan di bela di palo y navenan industrial. Un di nan, e Sirus, ta mas cu 100 aña bieu.
“E storia aki ta tocante Palestina. E storia aki ta con hende cu ta ser priva deliberadamente di e cosnan hopi basico pa por sobrevivi,” segun activista Sueco Greta Thunberg durante un conferencia di prensa. E lo ta un di e figuranan mas reconoci riba e expedicion, hunto cu actornan Susan Sarandon y Liam Cunningham, como tambe activistanan, politica manera ex-alcalde di Barcelona, Ada Colau, y reporteronan.
Esaki no ta e prome biaha cu Thunberg a purba yega awanan di Gaza e aña aki. El a ser deporta na juni ora e boto cu e tabata nabegando riba dje cu 11 otro persona, e Madleen, a ser confisca pa e ehercito Israeli.
“Ta hopi cla cu Israel ta sigui viola ley internacional por medio di sea ataca of intercepta inhustamente e botonan den awanan internacional, y ta sigui preveni ayudo humanitario di drenta den e teritorio,” Thunberg a bisa den un entrevista cu The Associated Press diasabra.
Cunningham a mustra un video di un mucha muher cantando mientras e ta planeando su mesun entiero. E mucha, yama Fatima, a muri cuatro dia pasa, el a bisa. “Ki sorto di mundo nos a bira unda muchanan ta reglando nan mesun entiero?” Cunningham a conta reporteronan.
Na fin di juli, e ehercito Israel a stop un otro boto di ayudo, a deteni 21 activista y reporteronan internacional y a confisca su cargo, incluyendo formula di baby, cuminda y medicina, segun e Freedom Flotilla Coalition.
Un oficial Israeli a bisa diasabra cu e pais lo pronto stop of frena ayudo humanitario den algun parti di Gaza norte, mientras e ta expande su ofensiva militar contra Hamas, un dia despues cu e ciudad a ser declara como un zona di combate.
