Brandweer ta controlando porta di emergencia di salida

Edificionan cu tin un porta di emergencia no mag di blokia esaki. E departamento di prevencion di Cuerpo di Bombero Aruba den e ultimo tempo ta teniendo controlnan riba edificionan cu no ta cumpli cu e rekisitonan stipula.

Un di e rekisitonan cu no ta wordo cumpli cu ne ta e porta di emergencia di salida. Tur hende sa cu riba e portanan di edificio tin e indicacion EXIT, y esaki ta pa yuda hendenan cu ta den e edificio por sali rapidamente pa cualkier emergencia cu por presenta, por ehempel si coriente bay of tin candela.

Reki di webo blokiando

Ningun obheto por blokia e porta di emergencia di salida, pasobra esaki ta contra ley. Na Super Food e bomberonan, na mas cu un ocasion a topa cu un reki grandi di webo dilanti e porta. E obheto aki ta stroba pa ora di evacua hende pa cualkier emergencia. Na varios ocasion a pidi nan pa kita e reki, pero ta mustra cu nan ta pone bek.

E siman a habri y un biaha mas a bay haci control na Super Food. Aki un biaha mas a haya e reki dilanti e porta. E biaha aki e bomberonan a pidi asistencia di polis pa asina papia debidamente cu e propietario. Cuerpo di Bombero lo traha nan rapport contra di e negoshi unda ta blokia e porta di emergencia di salida pasobra esaki a pasa mas biaha y e propietario no ta scucha di autoridad.