Manera cu ‘coronavirus’ na China no tabata suficiente, awor Brasil mester lidia cu otro virus potencialmente mortal cu a lanta cabes. E virus a bolbe aparece despues di tabata ‘drumi’ pa varios aña.

E ‘arenavirus’ ta menos contagioso cucoronavirus, por transmiti esaki solamente den contacto directo cu un persona infecta, a traves di por ehemplo sanger, orina, excremento, saliva, semen di un persona infecta o via contacto cu animal infecta manera djaca y raton.

Ministerio di Salud di Brasil a cataloga e ‘arenavirus’ como no tanto comun pero si letal, despues cu un persona a muri a causa di e enfermedad aki.

Pa e motibo aki e personanan cerca di e pashent cu a fayece dia 11 di januari ultimo, o esnan cu tabatin contacto cu e persona aki, ta bao di monitoreo pa evita cu e virus ta plama, manera e coronoavirus ta haciendo na China.

E ultimo informenan di ‘arenavirus’ ta asocia esaki cu keintura hemoragico, y aunke e ultimo casonan a tuma luga mas di 20 aña pasa, loke ta preocupa expertonan ta un posibel regreso di e enfermedad.

Ministerio di Salud Brasileño a informa cu e sintomanan di ‘arenavirus’ ta keintura, dolor muscular, rash, malestar general, dolor di cabes, stoma y garganta, ademas di sensibilidad pa luz.

A pesar cu por cataloga e sintomanan como comun, si e enfermedad avansa e por causa afeccion neurologico, sentimento di cansancio y soño, confusion y hasta convulsion.

E victima tabata un homber di 53 aña cu a fayece na hospital di facultad di medicina di universidad di Sao Paulo. E specialistanan no ta mira riesgo grandi pa propagacion di e virus.