Diasabra ultimo a cuminsa un candela na un hospital na Districto Federal di Brasilia, loke a obliga autoridadnan pa evacua e pashentnan den hospital di manera lihe, den pleno pandemia di coronavirus nobo.

E candela a cuminsa na Hospital priva di Santa Luzia y a provoca un nubia grandi di shinishi den e parti ariba di edificio, cu a yega te na shelo di e capital Brasilero, aunke despues esaki a keda controla.

Agentenan di Cuerpo di Bombero a yega na e luga pa paga e candela y yuda den evacuacion di e pashentnan, na un momento di emergencia debi na Covid-19, cu ya tin cerca di 120.000 morto y mas di 3.8 miyon di persona infecta na henter e pais.

Segun e investigacion preliminar, e candela a cuminsa na sala di mashinnan di hospital y te na e momento no tin informacion di persona herido.

E accion lihe di bomberonan a impedi cu e candela a extende den henter e centro hospitalario.

Brasil, cu un poblacion di casi 212 miyon persona, ta e di dos pais na mundo cu a wordo castiga mas cu e virus, despues di Merca.

Den hopi zona di e pais e pandemia no a wordo controla, manera ta e caso di Brasilia cu tin tres miyon habitante y tabata registra te diabierna ultimo 2.440 morto, 158.180 caso, y te ainda ta presenta un curva den su fase di aumento, segun loke ultimo rapport di Ministerio di Salud a bisa.

 

LEAVE A REPLY

Please enter your comment!
Please enter your name here