Diahuebs pasa den oranan di anochi, un candela den hospital di Rio di Janeiro a laga al menos 11 persona fayecido y a provoca escena di panico y caos; a transferi varios pashent den un operativo di emergencia mientras e huma tabata sali for di edificio.
“Tin un morto confirma”, e Cuerpo di Bombero di Rio di Janeiro (CBMERJ) a informa den un comunicado, sin detaya cu tabata trata di un pashent y si tambe tabatin persona herida. Despues a confirma e morto di otro dies persona, segun e informacion di Defensa Civil. A retira e curpanan durante oranan di anochi y ainda no a identifica e victimanan.
Informacion preliminar di e direccion di Hospital Badim, na e bario di Tijuca na zona nort di e ciudad, ta señala un faya di coriente na un generator como e causa posibel di e candela.
Famia di e pashentnan cu prensa local a entrevista a relata e momento di angustia cu nan a biba y nan a protesta pa e falta di informacion riba e traslado di e pashent cu a hiba pa otro hospitalnan.
Cuerpo di Bombero a splica cu varios efectivo ‘ta permanece na e local atendiendo e pashentnan, funcionario y bishitante. Cerca di 10 ambulance di e Cuerpo di Bombero ta actua den e evacuacion di e personanan’.
E mision di e rescate di e pashentnan a prolonga durante henter anochi y na prome oranan di diabierna. Den e tareanan a participa bombero, militar, personal di Defensa Civil y hasta mediconan y enfermero.
