(AFP) – Senado Brasileño diaranson ultimo a pasa un ley pa reduci e termino di prison di ex-presidente derechista Jair Bolsonaro, kende a keda condena di planea un golpi di estado despues di perde reeleccion contra e iskierdista Luiz Inacio Lula da Silva.
Aproba den e camara menor siman pasa, awo e ley ta bayendo pa Lula, di ken ta spera su veto lo ta anula pa Congreso.
Bolsonaro, 70, a cuminsa su sentencia di 27 aña den prison na november, y bao reglanan actual tabata spera di sinta al menos ocho aña den prison prome cu bira eligible pa un regimen mas suave.
E legislacion, cu ta cambia con ta calcula sentencia pa cierto crimen, sinembargo lo por mira Bolsonaro sinta tiki mas cu dos aña den prison.
Despues di lunas di maniobra di sostenedornan di Bolsonaro den Congreso pa algun sorto di amnistia, e ley a move sorprendentemente lihe door di tanto e camara menor controla pa conservadornan como e Senado cu ta mas balansa.
Yiu mayor di Bolsonaro, senador Flavio Bolsonaro – kende e ex-presidente a nombra como candidato pa derecha den eleccion otro aña – a bisa den un video cu “no tabata loke nos tabata bringando p’e, pero ta loke ta posible na e coyuntura aki.”
E ley a provoca protesta na ciudadnan rond di Brasil diadomingo, unda manifestantenan a grita “no amnistia” y a tene borchi bisando “Congreso, enemigo di pueblo.”
A pesar cu forsanan politico ta balansa mas igual den Senado, e ley a keda aproba 48-25.
Autor di e legislacion, legislador Paulinho da Forca, a bisa cu e tabata un “gesto di reconciliacion” den un pais polarisa.
Senadornan a haci amienda na e formulacion di palabra den e texto pa limita su beneficio, despues di miedo cu e lo por baha castigo pa un cantidad di criminal.
E ta destina specificamente pa beneficia esnan condena como parti di e intento di golpi di estado, como tambe e mas di 100 sostenedor di Bolsonaro kende a bay cera pa nan rol den riot na januari 2023 contra e sede di gobierno na Brasilia, tiki despues cu Lula a asumi su cargo.
Senador Sergio Moro, ex-minister di Husticia di Bolsonaro, a elogia e hecho cu e ley lo logra “saca e hendenan ey for di prison, cu ta lo mas importante aworaki.”
Bolsonaro ta sintando su castigo den un camber special na un facilidad di polis na e capital Brasilia, despues di un comienso dramatico pa su prome termino di prison unda el a pone un hero di strika riba su enkelband di monitoreo mientras e tabata den aresto domiciliario.
Bolsonaro a keda condena pa un plan pa stop Lula di asumi su cargo despues di su perdida cercano den e eleccion di 2022 cu a resalta e division politico na Brasil. E plan supuestamente tabata inclui un plan pa asesina Lula, su vice-presidente Geraldo Alckmin, y hues di Corte Supremo, Alexandre de Moraes.
Fiscalnan a bisa cu e plan a fracasa pa motibo di falta di sosten di alto mando militar.
Lula ta bisa cu ta bay veto e ley
Presidente Brasileño, Luiz Inacio Lula da Silva a bisa diahuebs cu e lo veto e ley. Sinembargo, el a reconoce cu Congreso por eventualmente anula su veto.
“Na momento cu e yega mi bureau, mi ta bay veto e. Esey no ta un secreto pa niun hende,” Lula a bisa durante un conferencia di prensa. “Mi tin derecho di veto, y despues nan tin derecho pa anula mi veto of no. Esey ta e wega.”
