(AFP) – Un magistrado di Corte Supremo diahuebs a duna ordo pa un investigacion tocante un pelicula tocante ex-presidente Jair Bolsonaro door di un bankero prisonero acusa den un scandal financiero multimiyonario, segun un fuente di corte a bisa AFP.
E pelicula “Dark Horse,” cu actor Mericano, Jim Caviezel como Bolsonaro, ainda no ta lansa, pero a bira un dolor di cabes mayor pa Flavio Bolsonaro, yiu di e ex-presidente y candidato den eleccion presidencial di october.
Na mei, e noticiero investigativo Intercept Brasil a publica un grabacion di audio di Flavio Bolsonaro puntrando bankero Daniel Vorcaro, kende e ta yama “ruman,” pa placa pa completa e pelicula.
Magistrado di Corte Supremo, Andre Mendonca a otorga un solicitud di polis pa investiga e financiamento di e pelicula.
Vorcaro tabata e accionista principal den e banco priva chikito, Banco Master cu a collapse despues di a hay’e insolvente aña pasa, lantando un investigacion tocante fraude.
E investigacion ey a expone un red di vinculo entre financieronan, hues top y politico, sacudiendo e estratonan mas halto di poder na Brasil.
Despues cu inicialmente a bisa cu no tin conexion cu e bankero, Flavio Bolsonaro a admiti cu el a pidie pa fondo pa “Dark Horse,” mientras a insisti cu nan no tabatin un “relacion personal cercano.”
Segun The Intercept, Vorcaro a priminti como $24 miyon pa e pelicula, pero na final a transferi menos cu mita.
Flavio Bolsonaro a baha den popularidad den encuestanan di opinion desde cu a leak e grabacion, pero e gobierno iskierdista di presidente Luiz Inacio Lula da Silva tambe ta afecta.
Senador Jaques Wagner a retira como lider di gobierno den Senado pa motibo di sospecho cu el a ricibi beneficio financiero pa defende interesnan di e banco den Congreso.
Lula mes a bisa cu e tabatin un reunion cu Vorcaro na 2024.
