E area deforesta ilegalmente na Amazonia Brasileño a crece 88,4% na luna di juni compara cu e mesun luna di aña anterior, segun e ultimo cifranan di Instituto Nacional di Pesquisa Espacial (Inpe), actualisa diaranson pasa.
Di acuerdo cu e proyeccion di e instituto aki, cu ta recoge datonan cada luna a traves di un sistema di alerta di alteracion den e cobertura forestal di Amazonia, e deforestacion ilegal a extende na juni pa 920 kilometer cuadra, riba e 488 kilometer cuadra di e mesun luna di aña pasa. Sinembargo, lo publica e datonan consolida pa e entidad na luna di october.
Ta e prome biaha cu e deforestacion ta aumenta durante dos luna consecutivo desde e yegada na presidencia di Jair Bolsonaro, kende ta den poder desde 1 di januari y ken a mustra faborabel pa e flexibilisacion di e reglanan ambiental di e pais. Sinembargo, algun lunanan prome, como april of maart di 2019, e deteccion di e area deforesta a cay na 49,4% y 29,5%.
Den e mesun linea, e director di husticia socio-ambiental di WWF Brasil, Raúl Valle a expresa cu Brasil ‘constantemente’ ta bin aumenta e area di deforestacion desde 2012, pero a situacion a bira mas grave desde aña pasa cu e politica ambiental di Temer, cu ‘a facilita e privatisacion di terenonan publico y a incentiva e deforestacion ilegal’ como medio di ‘reclama e derecho riba e propiedad’.
“E ilegalidad na Amazonia semper tabata grandi, pero awor e gruponan ilegal ta wak e declaracion y acto di Gobierno como un señal cu nan por avansa mas y ni un hende lo detene nan”, Valle a sigura.
