Cu henter un outfit di damita elegante, pretendiendo di ta su propio yiu muhe, e narcotraficante Clauvino da Silva, condena na 73 aña di prizon, a trata di huy di prizon. Cu peluca di cabey preto, bril, y un mascarada traha pa cubri su cara, e criminal a kere cu esey tabata suficiente pa sali di prizon, pero esey no a resulta asina. Un video, cu a bira viral, ta mustra con e ta obliga pa kita tur su disfraz pida pa pida, te cu ta aparece e berdadero cara di e criminal.

Di acuerdo cu Secretaria di Administracion Penitenciario (Seap) di estado di Rio de Janeiro, Clauvino da Silva, conoci como ‘Baixinho’ (bahito) a haya despues di e incidente un cel solitario di maximo siguridad di e compleho penitenciario Bangu 1 unda e lo keda, inicialmente durante 10 dia. A isol’e di e resto di preso despues cu el a trata di huy riba dia di bishita femenino.

Da Silva, cu tabata cera den Bangú 3, otro di e prizonnan di e compleho penitenciario mas grandi di Rio de Janeiro, a probecha di e bishita di su yiu muhe y aparentemente di e complicidad di un muhe na estado cu a logra pasa sin control di Xray, cu e disfraz cu e tabatin mester.

E agentenan di e centro penitenciario a ripara e intento di huy y a gara e preso ora e tabata bay reclama e documento di identificacion di su yiu, cu a keda den e prizon y cu lo kier a pretende despues cu su cedula a ser duna na otro persona di parti di esunnan responsabel pa control.

E hoben identifica como Ana Gabriele Leandro da Silva, a keda deteni y mester responde pa su actonan di facilita un fuga, cu por resulta den castigo di entre seis luna y dos aña.

Na 2013 da Silva y otro trinta preso a huy di un prizon di e mesun compleho via e sistema di riolering, pero un luna despues el a cay cera atrobe.