(AFP) – Diesmiles di persona a marcha na ciudadnan di Brasil diadomingo expresando oposicion contra un ley cu lo reduci e sentencia di prison di ex-presidente Jair Bolsonaro, condena di planea un golpi di estado.
Bao di e ley, cu Senado ta bay trata diaranson, lo por duna Bolsonaro libertad condicional despues di apenas dos aña di su sentencia di 27 aña.
E manifestacion tabata convoca pa grupo y activista iskierdista, incluyendo cantante iconico Caetano Veloso, despues cu e camara menor di Congreso, controla pa conservadornan, pasa e medida siman pasa.
Bolsonaro a bay cera na november despues di su condena pa un plan pa stop presidente Luiz Inacio Lula da Silva di asumi su cargo despues di eleccion na 2022.
Na Rio de Janeiro diadomingo, casi 19mil persona a inunda e famoso beach Copacabana cu borchi bisando “no amnistia” y “Congreso, enemigo di pueblo,” mientras Veloso y otro musico a duna un presentacion riba un escenario chikito.
“Nos t’ey ainda pa lanta Congreso. Nan no por traha pa nan mes. Nos t’ey ainda pa boskenan di Brasil, pa derecho di hende muhe, pa democracia. Nos t’ey ainda!” actriz Fernanda Torres a grita.
Torres a actua den e prome pelicula Brasileño pa gana un Oscar, “Ainda estou aqui” (Mi t’ey ainda), tocante e dictadura di 1964-1985 na e pais.
Na e megalopolis di Sao Paulo, alrededor di 14mil persona a yena e iconico Avenida Paulista.
Manifestantenan tambe a marcha na e capital Brasilia, for di Museo Nacional pa Congreso.
Si e keda aproba, e ley tambe lo beneficia sostenedornan di Bolsonaro kende a bay cera pa invadi edificionan di gobierno tiki despues cu Lula a asumi su cargo. E invasion dia 8 di januari 2023 na Brasilia tabata un echo di dia 6 di januari 2021 na e Capitol Mericano cu sostenedornan di presidente Mericano, Donald Trump.
Sostenedornan di Bolsonaro den e mayoria conservador di Congreso pa lunas a evalua diferente opcion pa alivia su castigo, incluyendo un posible amnistia cu a fracasa despues di protesta na september.
E ley di reduccion di sentencia a reaparece siman pasa, algun dia despues cu Bolsonaro a nombra su yiu, senador Flavio Bolsonaro, como su sucesor na caminda pa eleccion presidencial di 2026.
Flavio a bisa diadomingo ultimo cu e lo ta dispuesto pa retira su candidatura a cambio di amnistia pa su tata.
