Aparentemente un disputa entre dos organisacion criminal a provoca un rebelion den prizon di Altamira, estado Pará, situa na norte di Brasil. A conta por lo menos 52 morto di cual 16 tabata decapita.
Segun Superintendencia di Sistema Penitenciario di Pará (Susipe), dos agente di e centro penitenciario a ser tuma como rehen, pero cu ya a laga nan liber. E rebelion cu a cuminsa mainta 7or ora local, a dura cerca di cinco ora.
E motin lo a cuminsa despues di un pelea entre organisacionnan criminal. Segun Susipe, un grupo di preso a invadi e anexo unda e fraccion rival tabata. A cera e luga na yabi y a cende na candela, causando e mayoria di morto pa asfixia. E unico armanan haya despues tabata algun cuchiu. Polis Militar y Civil a drenta e luga y tabata negociando liberacion di rehen.
“E prizon ta bieu y tin dos fraccion criminal eyden. Nos no tabatin un informe di nos inteligencia cu lo por a anticipa un atake di e magnitud aki,” e secretario di Susipe, Jarbas Vasconcelos, a bisa, y a añadi cu “e tabata un atake localisa dirigi na extermina integrantenan di e fraccion rival.”
Segun un informe di Conseho Nacional di Husticia (CNJ), recogi pa e diario O Estadao, e prizon yama Centro di Recuperacion di Altamira (CRRALT), ta den condicion “pesimo”. Ademas di e sobrepoblacion, tambe e tin un cantidad chikito di agente penitenciario pa garantisa siguridad.
Segun CNJ e luga tabatin 343 preso di sexo masculino, mientras e tin capacidad pa 163, cu 33 guardia pa vigila e luga. Ta trata di e di dos masacre e aña aki na prizon di Brasil, despues cu na mei pasa a cay 55 victima mortal den un motin den prizon na Amazonas.
