(Infobae) – Den mey di un situacion sanitario alarmante cu e pais ta atravesa pa e aumento di casonan y morto pa coronavirus, cientificonan Brasileño a detecta un variante nobo di covid-19 na Belo Horizonte y Region Metropolitano.

Di acuerdo cu loke autoridadnan a indica, e cepa nobo aki ta presenta un combinacion di 18 mutacion. Algun di nan a wordo comparti cu variantenan Brasileño P1 (cu a origina na Manaos) y P2 (Rio de Janeiro), asina como esun sur Africano (B1.1.351) y Britanico (B1.1.7).

E variante nobo a wordo haya pa Laboratorio di Biologia Integrativo di Instituto di Ciencia Bilogico di Universidad Federal di Minas Gerais (UFMG) y pa Sector di Investigacion y Desaroyo di Grupo Pardini, den colaboracion cu Laboratorio di Virologia Molecular di Universidad Federal di Rio de Janeiro (UFRJ) y Ayuntamento di Belo Horizonte.

E aparicion di e variante aki ta aumenta e preocupacionnan di autoridadnan, ya cu tur e cepa a demostra cu ta mas infeccioso y agresivo cu esun original.

E virologo di UFMG, Renato Santana, a splica cu ta hopi trempan pa sa si e variante nobo ta mas transmisibel, ya e sa caba cu tin mutacion describi cu otro cepanan cu a provoca un mayor risico di morto, di acuerdo cu loke e website G1 a reporta.

Segun Santana ta parce cu e personanan infecta pa e variante nobo no a realisa biahenan internacional ni tabatin conexion cu otro estadonan. No obstante, ainda ta necesario realisa estudionan nobo pa determina exactamente ki dia y na unda el a aparece.

Mirando e grave situacion cu Brasil ta atravesa -di dos pais mas afecta pa e pandemia na nivel mundial- cientificonan local a adverti caba cu tabata probabel cu lo surgi cepanan nobo di coronavirus.

Tambe Santana a señala cu tin cu investiga e posibel impactonan di e variante nobo na e capacidad di inmunisacion di e vacunanan cu ta aplica na Brasil: “Tin cambionan den mesun regionnan importante cu ta identifica pa anticurpa neutralisante produci pa e vacuna. Pero ainda ta demasiado trempan pa haya sa si tin algun repercusion den eficacia di e vacunanan”.

LEAVE A REPLY

Please enter your comment!
Please enter your name here