Centenares di trahado di e empresa Ford na Sao Bernardo do Campo, na Sao Paulo, a reuni ayera na sede di nan sindicato y a inicia un welga indefini, como protesta pa e decision di e compania di cera porta di e fabrica unda 4.500 persona ta traha.

Ford a anuncia cu lo cera e fabrica situa na region metropolitano di Sao Paulo, esun mas antiguo cu e compania Mericano tin na Brasil, como parti di un decision strategico di stop di produci y bende pickup na Suramerica.

E Sindicato di Metalurgico, cu ta representa e empleadonan di Ford, a reuni ayera cu e trahadonan di e compania na e patio di su sede, unda 400 persona a acudi. Bao liderazgo di presidente di sindicato , Wagner Santana, nan a inicia un marcha na municipio di San Bernardo te na e sede municipal.

Durante e asamblea, e sindicato a dicidi di oficialmente convoca un welga pa tempo indefini, mientras e empleadonan ya a stop di traha desde momento cu a duna di conoce e ciere di e planta.

E sindicato tin un reunion programa pa otro siman cu director di Ford, James Hackett, na sede di e compania na Michigan, Merca, pa trata di cambia e decision.

Na red social Twitter, Lula da Silva, a sugeri pa e trahadonan presiona gobierno actual, presidi pa Jair Bolsonaro, “pa prohibi importacion di producto di e empresa cu ta fabrica na otro pais,”, si nan ta sigui cu e ciere.