Senador Flavio Bolsonaro, yiu homber mayor di e presidente Brasilero, Jair Bolsonaro, a haya coronavirus, pero no ta presenta sintomanan y lo permanece na cas, segun su oficina di prensa a informa diamars ultimo.

E legislado, cu ta investiga pa caso di supuesto corupcion, ta di cuater miembro di e famia cu a wordo contagia di e enfermedad, cu a mantene e mesun gobernante separa di su funcionnan durante 20 dia luna pasa.

Dianan despues di e recuperacion di e presidente, su casa Michelle Bolsonaro a sali positivo, y dies dia atras otro yiu, Renan di 22 aña y e menor di su cuatro yiu homber, tambe a wordo contagia.

E senador Flavio Bolsonaro ta investiga actualmente pa Fiscalia di Rio de Janeiro pa sospecha cu, ora e tabata eherce e funcion di diputado regional den estado aki, tabata contrata funcionarionan ‘spirito’ na Asamblea Legislativo, cu tabata entrega p’e parti di nan salario.

Den actividadnan ilegal aki ta sospecha cu e tabatin apoyo di su hefe di gabinete na e momento ey, yama Fabricio Quiroz, cu aworaki ta deteni y acusa di administra e placa ey, cu den su parti tabata termina den Flavio su cuenta di banco y di otro miembro di e famia Bolsonaro, entre nan e prome dama.

Segun su oficina di prensa, durante e tempo aki e senador lo wordo trata cu hydroxychloroquine, un farmaco cu te ainda no a wordo comproba cientificamente, pero cu e presidente Bolsonaro ta promociona desde inicio di e pandemia manera un remedi eficaz.

LEAVE A REPLY

Please enter your comment!
Please enter your name here