(NTN24) – Brazil, e mayor economia Latino Americano cu 213 miyon habitante, awe diahuebs lo ofrece su red 5G, un tecnologia cu e cual ta espera modernisa su sector productivo y atrae inversionnan pa 9.000 miyon dollar.
Ademas di e red principal, di uso general, Brazil lo ofrece e operacion di un red paralelo pa uso exclusivo di gobierno, den cual no lo por usa ekiponan di empresa Chines Huawei, cu a ser exclui pa un discusion geopolitico cu ta expone spionahe.
Un total di 15 compania a presenta nan proposicion na Agencia Nacional di Telecomunicacion (Anatel), incluyendo e tres grandi cu ta opera servicio di telefon y Internet na e pais: Tim (filial Brasileño di Telecom Italia), Vivo (Brasil) y Claro (Mexico).
Di e balor ey, gobierno tin proyecta recauda casi 10.000 miyon real pa uso di frecuencia y e resto ta coresponde na inversionnan di infrastructura nobo, incluyendo ekiponan y torennan di transmision.
Specialistanan ta calcula cu 5G ta precisa entre cuatro pa dies biaha mas antena cu 4G.
Lo ta den palabracionnan cu blokinan regional y nacional di diferente frecuencia. Cada un cu un fin, velocidad y alcance diferente.
E licencia di operacion ta pa un periodo di 20 aña.
E companianan ganado lo tin cu provee 5G na Districto Federal y 26 capital estatal prome cu 31 di juli di aña 2022.
Pa e ciudadnan cu ta resta, cu poblacion di mas di 30.000 habitante, e yegada di 5G ta plania entre 2025 y 2028.
Na mesun tempo cu ta dirigi di duna un paso na futuro, Brazil lo busca ripara e atraso di e areanan menos desaroya, unda te ainda tin 40 miyon persona sin conexion.
E subasta ta inclui e compromiso di e companianan ganado di hiba internet na localidadnan cu ainda no tin’e, amplia e cobertura den careteranan, scolnan publico y region Amazonico.
E fecha di e subasta a ser posponi durante varios luna, den memey di discusion geopolitico entre China y Merca, cu a hiba Brazil pa coloca e exigencia di un red paralelo pa mantene Huawei na margen di datonan mas sensibel.
