Despues di un trayecto largo y cu hopi expectativa di comunidad, e bon noticia a yega cu desde ayera 1 di december 2025, Bureau Ombudsman a habri porta pa por brinda servicio na comunidad.

E preparacionnan pa Aruba haya su propio Ombudsman ta bay back al menos 20 aña, tempo cu na 2005, parlamentarionan Zulay van Poppel, Kenneth Jong y Seferino Bislik a presenta e prome concepto di ley di Ombudsman na Parlamento. Sinembargo, no a completa esaki.

Despues, na 2010, fraccion MEP a entrega un concepto di ley nobo, pero un biaha mas no a logra completa e proceso.

Finalmente, despues di hopi trabao, den un reunion publico di dia 8 di juli 2024, Parlamento di Aruba a nombra Mr. Jurima A.R. Bryson pa asumi e posicion di Defensor di Pueblo di Aruba, esta Ombudsman.

Despues di su huramentacion, cada parlamentario lider di fraccion di partido a duna palabra di pabien na Bryson y tambe a enfoca riba e funcion importante aki.

Na e ocasion, prensa a haya e oportunidad di entrevista Bryson kende a sigura cu e palabranan di pabien no ta solamente dirigi riba su persona, sino tambe na e pueblo di Aruba cu despues di tanto aña a logra pa esaki por bira un realidad.

“E ta un pabien pa Aruba, cu e instituto di Ombudsman a bin, a ser estableci y a ser nombra, pero awor e trabounan ta bay cuminsa, awor nos ta bay haci e tarea cu nos mester haci pa institui e behoorlijkheidsnormen, e reglanan pa nombra Kinderombudsman, pa tuma personal, pa haci tur cos posibel pa e instituto por cuminsa cana,” el a sigura.

Trayecto amplio te cu 1 di december 2025

Despues di a nombra mr. Sra. Jurima Bryson como e prome Ombudsman di Aruba 1 di october 2024, inmediatamente a cuminsa cu preparacion pa por instala e oficina y forma e team di Bureau Ombudsman. Cu dedicacion di e team, ayudo local y internacional, Ombudsman di Aruba a logra pone un fundeshi firme den un tempo relativamente corto pa un institucion encarga cu trato di keho di comunidad den forma independiente y imparcial.

Servicio di Bureau Ombudsman

Desde 1 di december 2025, e ciudadano por acerca Bureau Ombudsman ora nan tin un keho contra un instancia. Den cuadro di e Ley ‘Landsverordening Ombudsman’, un ciudadano por entrega un keho contra e siguiente instancianan:

organonan administrativo;

entidadnan huridico cu gobierno a institui;

companianan estatal;

organisacionnan priva cu tareanan di interes general y cu ta ricibi placa di gobierno;

organisacionnan priva cu ta ehecuta tareanan cu mucha y hoben (tur persona te cu 17 aña) riba tereno di enseñansa, ayudo y guia, cuido, cuido medico; y

tambe tur e empleadonan di dicho instancianan, hasta si e relacion di trabao a termina caba.

Prome cu e ciudadano por haci uso di e servicio di Bureau Ombudsman

Tur hende por entrega un keho contra un instancia segun Ley cerca Ombudsman. Ademas, pa por entrega un keho cerca Ombudsman, e ciudadano mester a entrega su keho cerca e instancia concerni prome. Si esaki no a sosode, no por haci uzo di e servicio di Bureau Ombudsman ainda.

Prome investigacion
 Luna pasa, Bureau Ombudsman a anuncia e paso historico di cuminsa su prome investigacion.

Den e trayecto di preparacion, Ombudsman a wordo informa cu na algun scol – den algun caso specifico ora un mucha ta malo y no por presenta na scol – tin cierto maneho y/of reglanan di scol cu no tur ora tin e mucha/hoben y su derecho di por haya educacion como prioridad.

Por ehempel, a compronde den algun caso cu e mucha mester raporta na un compania priva pa por obtene un declaracion medico, pues un carta cu ta indica cu e ta malo (un ‘ziektebrief’). Tambe den cierto caso, e mucha mester haci pago na e compania priva pa por ricibi e declaracion medico cu scol ta pidi. Ademas, por sucede cu si e mucha no por cumpli cu e procedura comunica na dje, scol no ta duna e mucha oportunidad pa haci of ripiti test / examen cu e la perde.

Ombudsman ta un instituto independiente y imparcial. Den Ombudsman su ley ta poni cu Ombudsman tin e tarea pa entre otro boga pa derecho di mucha y hoben. Den e cuadro di esaki, Ombudsman tin e autoridad pa haci e investigacion aki pero tambe ta autorisa pa colecta dato.

Tur mucha mester tin mesun derecho ora ta trata di educacion irespecto di nan situacion financiero. Pa e motibo aki, Ombudsman lo manda pronto encuesta pa na un banda mayor, mucha y/of dunado di cuido di mucha/hoben y na otro banda pa e directivanan di scol cu ta cay bao di e ley di Ombudsman, esta e Landsverordening Ombudsman.

Despues di colecta e datonan, Ombudsman lo haci un analisis, publica e resultadonan y tambe bin cu recomendacionnan si ta necesario. Pa cu esaki Ombudsman lo tene na cuenta e tratadonan di derechonan di mucha y tambe e normanan di conducta apropia cu Ombudsman a publica na april 2025.

Ombudsman a informa tur stakeholders y mandatarionan responsabel pa e tema aki tocante e proposito di e investigacion, e partidonan envolvi den e investigacion, e base legal y e motibo di e investigacion. Ombudsman ta enfatisa cu directivanan di scol tin e obligacion pa coopera cu e investigacion aki, mirando cu nan ta un instancia segun ley.

Bureau Ombudsman kier a informa cu nan lo mantene pueblo na altura di e ultimo desaroyonan y encuanto e apertura oficial di oficina.

Informacion general

Bureau Ombudsman ta habri di dialuna pa diabierna:

Dialuna y diabierna

Sin cita 8:30 – 11:30

Cu cita 14:00 – 15:30

Diaranson

Sin cita 8:30 – 11:30

Merdia: cera pa publico

Diamars y diahuebs

Cu cita 8:30 – 11:30

Sin cita 14:00 – 15:30

Bureau Ombudsman ta situa na Caya G.F. Betico Croes 149, Oranjestad, Aruba.
Telefon ta +297 281 6800 y por mail na info@ombudsman.aw.

Por entrega un keho directamente via e portal di Ombudsman via e website.

Danki na comunidad

Sra. Bryson y su team kier gradici comunidad pa e palabranan di motivacion y actonan di apoyo den e ultimo aña. Comunidad tabata warda pa e momento importante aki pa hopi aña y cu esaki na mente, Bureau Ombudsman a haci su maximo esfuerso pa por inicia cu brinda servicio lo mas pronto posibel. Sin nos comunidad, nos no tin e Colegio Maximo di Estado nobo aki (nos Ombudsman, nos Defensor di Pueblo).

Keda na altura di tur desaroyo

Bureau Ombudsman ta mantene comunidad informa via e siguiente canalnan di comunicacion:

Facebook: Ombudsman Aruba

Instagram: ombudsmanaruba

LinkedIn: Ombudsman Aruba

Website: www.ombudsman.aw