Riba Dia internacional di Derecho di Mucha, 20 di november, den un encuentro ameno cu tur trahado di Bureau Sostenemi y esnan di Seccion Guia Social y Seccion di Bida y Famia di Departamento di Asunto Social, e directornan di ambos organisacion a firma un convenio di trabao.
Esaki ta e resultado final di un proceso largo cu a bin ta tuma lugar pa asina por evalua e proceso di traha hunto y tur palabracion cu ta importante pa haci e ayudo na famianan mas eficiente y efectivo cu ta posibel. E encuentro tabata encera actividadnan pa tur trahador por cera conoci mas miho cu otro, cu e meta pa reforsa e relacionnan di trabao entre e trahador.
A scoge e fecha aki, mirando cu e cooperacion entre e dos organisacionnan aki ta netamente pa implementa e Tratado Derecho di Mucha y percura pa muchanan cu ta na peliger por haya e proteccion cu nan tin derecho riba dje. Diariamente trahadornan di ambos organisacion ta den contacto cu famianan cu mester ayudo di un of otro forma.
Bureau Sostenemi tin e tarea importante, hancra den ley, pa tuma tur melding di cualkier forma di abuso cu por ta tumando lugar, evalua esaki y stipula e siguiente pasonan. E trahadornan di Departamento di Asunto Social na nan turno ta brinda e sosten, guia y terapia na e famianan cu ta habri pa esaki.
Firmando e convenio aki, trahadornan ta haya un guia cla di con e cooperacion lo cana y kico tarea di cada departamento ta. Traha hunto ta un proceso di conoce otro y continuo evaluacion, pues despues di un aña lo evalua e convenio haci y adapta esaki unda ta sinti necesario.
