‘Burubundu Residence’ y e liña fini entre cumpli cu demanda y un Aruba sostenible

Pos Chikito lo tin un residencia nobo situa den bario di Burubundu. Esaki ministerio di Vivienda a anuncia recien, unda lo brinda 850 pa 1000 cas pa ciudadano. Memey di un scarsedad di vivienda riba e isla, e proyecto aki a genera reaccion fuerte for di comunidad, cu un parti elogiando e iniciativa y otro parti criticando e proyecto como desastroso pa naturalesa den e area. Mirando e reaccion fuerte, ta cla cu e proyecto aki ta toca un preocupacion den comunidad tocante con ta balansa cumpli cu demanda y mantene Aruba sostenible. Na mesun momento, e ta punta na un problema mas grandi cu nos isla ta enfrentando: Sobrepoblacion.

Segun analisis mas recien di Central Bureau of Statistics (CBS) na december 2025, poblacion di Aruba a mira un crecemento skerpi den e ultimo dos aña. Di 2024 pa 2025, crecemento di poblacion tabata 1,97% unda te awor e cantidad di hende bibando na Aruba ta 110.625. Den 2025 tambe a registra un peak den inmigracion desde 2004/5 cu 4.260 entrada di stranhero. Cu e crecemento aki, demanda di vivienda tambe a aumenta drasticamente y den ultimo tempo buraconan den mercado a ser revela. Banda di esey mundo ta pasando den un recesion; un consecuencia for di e pandemia di Covid-19 cu a paralisa economia global.

Na Aruba, e dos factornan aki a limita accesibilidad na e mercado di vivienda pa hopi hende. Cu mayoria di hende na Aruba ganando alrededor di Afl. 2.500, y hopi di nan salario minimo, ciudadanonan cada bes ta confronta un realidad dificil: prijs halto pa viviendanan di huur—y cu hopi biaha ta demasiado chikito pa acomoda un famia—of casnan na benta unda mayoria ta bale un minimo di mita miyon florin. Pa famianan cu yiu chikito, e ta hacie dificil pa por haya un cas pa biba confortablemente. Pa recien graduadonan cu ta bin back for di exterior, e ta kita nan oportunidad pa crea un bida den nan pais natal, forsando hopi pa bay back afo of no bin Aruba back mes.

P’esey e anuncio di un residencia nobo ta zona como un paso den bon direccion; mas cas pa localnan por haya. Sinembargo, e proyecto di Burubundu Residence ta parce di tin un banda negativo cune, cual hopi critico a referi na dje na momento cu a anuncia e iniciativa.

E critica cu ta rondona e proyecto ta e hecho cu construccion di e residencia lo resulta den mas rosamento di mondi. E topico di sostenibilidad a bira particularmente dominante den e ultimo añanan, durante cual comunidad a cuminsa ripara e reduccion drastico di areanan natural riba e isla como consecuencia di sobredesaroyo stimula principalmente pa e sector di Turismo.

Pa crea un residencia cu meta pa acomoda no solamente te cu 1000 cas, sino tambe centro comercial, parke recreativo y facilidadnan di servicio manera a anuncia, por imagina con grandi e sitio di construccion mester ta. Esaki ta nifica claramente rosamento di area di mondi grandi situa hopi cerca di e area protegi di Spaanslagoen. Manera un comentario riba Facebook a bisa bao aviso tocante e proyecto, “Ta obvio cu mester mas vivienda pero esey no mester bay a costo di destroza mas naturalesa. Tin otro opcion. Nos a perde gran parti di nos Aruba caba door di demasiado construc[ci]on.”

Como reaccion, un otro usuario a trece un punto tambe relevante: “bo a caba di bisa cu mester mas cas pero tampoko kier kita mondi unda anto mester traha cas ta 1 of e other but si mester terrain pa traha cas unda bo kier haya e terrain anto.”

E dos comentarionan aki ta ilustra precisamente e liña fini cu ta existi entre cumpli cu demanda di vivienda y mantene Aruba sostenible. Ta birando cla cu Aruba mester yega na un balans atrobe si no kier enfrenta consecuencianan duradero. Pero pa un isla unda gran parti di nos naturalesa a ser tuma pa desaroyo, e pregunta a bira si yega na un balans ta realistico ainda.

Si mira Aruba riba un mapa satelital, ta parce cu Parke Arikok ta practicamente e unico area riba nos isla unda naturalesa ainda ta domina. Claro, esaki danki na un ley cu ta designa e area como tera protegi. Banda di esey, por mira henter e parti sur y costa occidente yena cu cas, edificio y caminda. Tambe tin e area mas panort di nos isla cu poco poco tambe ta perdiendo su naturalesa. Pues por mira cu nos mesun wowo cu Aruba ta birando mas yen aña tras aña. Esaki ta algo cu ciudadanonan ta sinti y mira den nan bida diario tambe; areanan completamente rosa, tur aña un hotel of condominio nobo y demasiado auto riba caminda. Na mesun momento, e poblacion ta sigui crece.

Aruba ta yegando cada bes mas cerca di su limite den capacidad, na mesun momento enfrentando un demanda creciente. Y esaki ta un preocupacion cu te ainda no a haya reconocemento berdadero di gobernantenan—ambos den gobierno actual cu den pasado. Aunke gobierno ta reconoce e scarsedad den vivienda (cu Burubundu Residence un intento pa remedia esaki), ta parce cu e solucion di traha residencianan nobo lo crea un otro problema, un cu consecuencianan mas duradero.

Y esey ta laga un pregunta grandi atras: Kico ta priorisa e ora? Cumpli cu demanda, of protege nos naturalesa? E contesta pa esaki ta keda den man di esnan cu pueblo eligi pa gobierno, unda por spera lo trece solucion berdadero pa bienestar di Aruba su ciudadanonan.