Dia 12 di juli ultimo Aruba a keda conmovi pa e noticia cu cuater piscado, cu a sali den e yate Energy, no a regresa Aruba. Durante e dianan cu a sigui despues di esaki, e buskeda di Wardacosta di Aruba y partnernan internacional a tuma lugar, y minister di Husticia mr. drs. Arthur Dowers a duna un declaracion na prensa unda a sigura e comunidad cu tabata haciendo tur esfuerso posible pa yega na e piscadonan.
Gobierno di Aruba a informa cu Wardacosta tabata haciendo tur su esfuerso y a haci uso di modelonan computarisa maritimo manera coriente di lama, direccion y forsa di biento pa haci calculacion di mas o menos den cual area e boto por tabata, sinembargo e esfuersonan aki tabata en vano. Mientras tanto, no por a descarta cu e yate a sali for di e awanan teritorial di Aruba, pa cual a tuma contacto cu autoridadnan Colombiano pa brinda sosten den e buskeda.
E buskeda a sigui y te hasta expande internacionalmente, pero lamentablemente esaki no a duna resultado. Despues di alrededor dos siman, Gobierno di Aruba a informa cu wardacosta di Caribe Hulandes a pasa e caso over na Wardacosta Colombiano, mirando cu e area di buskeda a drenta completamente den nan area di responsabilidad, aunke a enfatisa cu lo sigui cu un bista skerpi durante di nan patruyahe.
Recientemente Gobierno di Aruba a informa cu a tene un reunion virtual cu autoridadnan di Colombiano tocante e buskeda cu ta continua pa e cuater piscadonan Arubiano cu a disparce riba lama. Famia di e piscadonan y Consul Colombiano na Aruba, Gustavo Serrano Amaya, tambe tabata presente.
Durante e reunion autoridadnan di Colombia a duna un splicacion detaya tocante nan esfuersonan di buskeda y alabes a informa cu basa riba dato actual tocante e corientenan di lama y simulacion deriva, ta indica cu tin un posibilidad real cu e boto Energy a sali for di teritorio maritimo di Colombia y por ta drenta na zona cerca di Nicaragua of Costa Rica.
Den e contexto aki, Gobierno di Aruba a manda un carta formal dia 28 di juli pa Embahada di Reino na San José, Costa Rica, pidiendo pa hinca contacto diplomatico cu e autoridad di e dos paisnan. Aruba ta pidi nan cooperacion den e buskeda continua, incluyendo mobilisacion di patruya, exploracion aereo y intercambio di informacion.
