Pueblo di Aruba tin varios siman ta duna siguimento na e caso di dia 12 di juli, unda e yate Energy, cual tabatin 4 piscado di Aruba abordo, a perde. Despues di a constata cu e yate no a regresa y a reporta esaki na autoridadnan, inmediatamente a cuminsa un buskeda profundo, unda a mobilisa tur herment posible bao disposicion di Aruba pa yega na e paradero di e yate aki.
Ademas di autoridadnan di Aruba, autoridadnan di Corsou tambe a brinda sosten y a participa den e buskeda aki. Varios informacion a cuminsa circula riba rednan social sin verificacion, entre otro cu e yate tabatin un falta di mantencion, cu 3 ocasion den e aña aki unda mester a haci reparacion na e bom di e yate pa motibo cu esaki a scheur y awa a cuminsa pasa.
Despues di varios dia y siman di esfuerso pisa cu colaboracion di paisnan bisiña manera Venezuela y Colombia, mester a pasa e buskeda aki oficialmente den man di Colombia.
Den ultimo desaroyo di e caso, a informa cu despues di 15 dia, autoridadnan di tanto Venezuela, Aruba como Colombia a para e buskeda di e yate y e 4 piscadornan abordo.
