Mientras e buskeda ta continua pa e barco Energy y su cuatro tripulante cu a desaparece, ayera tardi prome minister a duna un update tocante e esfuersonan di buskeda na prensa local. Segun Eman, e buskeda a expande internacionalmente.
Premier Eman a bisa cu el a ricibi “un briefing hopi completo” for di miembronan di Kustwacht. “Un trabao hopi grandi ta wordo haci durante e di prome dia caba, diadomingo cu a inicia cu e buskeda. Pero awe por bisa cu e tabata un di e buskedanan mas grandi – por ta den historia – cu a wordo haci, y ta wordo haci na e momentonan aki.”
Eman a bisa cu e avion di kustwacht ta bulando riba un area hopi grandi na costa di Colombia, e fregat di Hulanda cu tabata na direccion di Haiti a ser hiba na e costa di Colombia, y e ta participando activamente den e buskeda. Tambe un helicopter cu a sali for di e fregat a participa den e buskeda. Ademas, tin un beach craft priva di Sr. Ruben Croes, entre otro esfuersonan priva, ta asistiendo den e buskeda. Tambe a haci peticion pa uso di un satelite di Hulanda pa duna ayudo cu e buskeda. “Awe a bolbe reafirma e peticion ey pasobra a bin atrobe e peticion pa mira sigur sigur si e satelite ey a wak algo,” Eman a agrega.
Prome minister a bisa cu tabatin contacto cu Kustwacht riba e siguiente stapnan, unda Colombia lo tin un rol “mas intensivo” si ayera no tabatin resultado den e buskeda. “Pero mañan ta mañan, nos ta focus awe ariba awe, y awe e buskeda tin un intensidad hopi hopi grandi.” Pa diahuebs, Eman a bisa cu ta evaluando e posibilidad pa usa avion di Colombia tambe.
Eman a bisa cu den diferente momento “tabatin indicacionnan – tabatin un salbabida cu tin un potret di dje cu mi por a mira tambe; famianan a wak e potret, y no ta pensa cu ta di e boto,” pero toch lo purba haya esaki pa descarta absolutamente cu e ta relaciona cu e boto desaparecido.
Prome minister tabatin palabranan di elogio pa e trabao di Kustwacht y pa nan atencion pa e famia di e desaparecidonan. Eman a enfatisa cu ta keda cu “speransa y cu oracion na nos creador” cu lo por haya e boto cu e tripulantenan sano y salvo. Esfuersonan di buskeda a continua ayera te cu solo a baha.
Cuatro naufrago na Nicaragua
Un noticia cu a hala hopi atencion na Aruba tabata di Canal 10 Nicaragua, cu a reporta cu un barco “tipo panga cu cuatro tripulante a naufraga diamars ultimo” den Caribe Sur. E nabegantenan a keda rescata pa otro barco y transporta na tera firme. Soldadnan di Distrito Naval Caribe a recupera e barco, pero a perde e motor. E noticiero a nota cu e identidad di e tripulantenan y nan destinacion na momento di e naufragio no tabata conoci, loke a lanta speransa entre comunidad local cu lo por trata di e piscadornan di Aruba. Hopi ciudadano local a comenta y comparti e noticia aki cu speransa cu lo por duna un resultado positivo.
Sinembargo, te ciere di e edicion aki, no tabatin ningun confirmacion di e identidad di e naufragonan.
Potret di Canal 10 Nicaragua y Aruba Weather Watch.
