Ayera durante dia, Wardacosta di Aruba y partnernan internacional a continua e buskeda pa e barco cu a sali for di Aruba cu cuatro persona abordo y a desaparece.

Relaciona cu e situacion di e yate “Energy” cu ta perdi riba lama desde diasabra, Minister di Husticia mr. drs. Arthur Dowers a duna un declaracion na prensa den cual a sigura comunidad cu ta haciendo tur esfuerso posibel pa localisa e piscadonan.

Segun un comunicado di gobierno, Kustwacht ta haciendo tur esfuerso y ta usando modelonan computarisa maritimo manera e coriente di lama y direccion y forsa di biento pa haci calculacion di mas o menos den cual area e boto por ta, pero te ainda tur intento ta en vano. Mientrastanto, no por descarta cu e yate por a sali caba pafo di awanan teritorial di Aruba, pa cual a tuma contacto cu autoridad Colombiano pa duna un man den e buskeda. Minister Dowers a informa cu Setar a “ping” e ultimo lugar na unda a haya señal di celular prome cu e perde contacto y a logra determina e area den cual a cuminsa busca.

Ayera, prome minister Mike Eman a duna prensa local un actualisacion riba e caso for di Mariniers Kazerne.

Premier Eman a cuminsa bisa cu ayera tardi a “reuni basta largo” cu miembronan di Kustwacht y famia di e desaparecidonan, unda Kustwacht a duna un resumen di tur e investigacion cu ta haciendo na e momento aki. Segun Eman, “tur e aparatonan di Kustwacht a wordo utilisa, ayera hopi ora di buskeda cu avion, buskeda cu helicopter. Awe mainta di 7or y mey atrobe buskeda cu avion,” y atardi e avionnan a sali atrobe.

Prome minister a expresa cu por sinti cu Kustwacht ta haciendo tur loke por wordo haci pa localisa e cuatro Arubiano desaparecido lo mas pronto posible, y a expresa su speransa cu lo tin un resultado positivo y lo haya e boto cu e tripulantenan na bida. “Casonan asina tin hopi, caminda cu despues di basta dia toch a logra di haya tur hende sano y salvo. Kiermen laga nos keda cu e fe ey, y nos tin tur confiansa tambe cu Kustwacht ta haciendo di su parti.”

Premier Eman a bisa tambe cu Kustwacht a notifica tur barco y avion civil cu por ta pasando door di e area, “pa tira un bista” y colabora cu e buskeda, enfatisando cu tempo ta esencial.

Hefe di Kustwacht, Capitan Mark Solognier, a bisa cu pa ayera tardi tabata buscando den un area “basta leu”, cu e avion. “Nos no ta give up. Nos ta sigui busca te unda cu por,” Capitan Solognier a bisa prensa local. El a enfatisa tambe cu tin contacto constante cu famia di e desaparecidonan. Contestando si tin colaboracion di otro pais den e buskeda, Solognier a bisa cu “tin bon contacto cu Venezuela y Colombia tambe” den e parti di Search and Rescue. Ademas, Solognier a splica cu “ta wordo proyecta a base di un programa cu nos tin” den ki area mester busca e barco, y pa esaki, ayera a usa avion y no barco di Kustwacht, pa motibo cu ta basta leu. “E ta un area basta west di Aruba,” Solognier a bisa. E buskeda ta continua “te ora cu solo baha,” el a informa.

Te cu ciere di e edicion aki, no tabatin mas informacion.