Recientemente Sra. Esther Croes a haya e tremendo honor di a wordo invita pa participa como hues den e deporte di Landamento Sincronisa na e “China National Games”, cu ta wordo organisa cada 4 aña na China.
Esther tin 28 aña di experencia den e deporte aki como hues. Na principio como hues General pero recientemente a wordo promove na e categoria “Judge- A” cu por cierto ta e categoria mas halto cu tin den FINA, e Federacion Mundial di Natacion cu ta reconoci pa e IOC (International Olympic Committee). E “China National Games” ta e weganan mas importante pa China, unda un total di 31 diferente deporte ta participa, y na unda nan ta forma nan seleccion pa e siguiente ciclo Olimpico. Por cierto e tawata un gran honor pa por ta hues, hunto cu 9 otro huesnan procedente di diferente paisnan di mundo, den un competencia asina grandi y di un di e nivelnan mas halto na mundo. E competencia a tuma luga na Tianjin, cu ta keda mas o menos 1 ora y mey for di Beijing. Fuera di tawata hopi ocupa na piscina tawatin un tiki tempo pa siña conoce algo di e pais. Berdaderamente un experiencia unico!
