Recientemente Colegio di Supervision Financiero di Aruba (CAft) a publica su conseho riba e di dos amienda di presupuesto 2025 adopta, den cual e ta declara cu Aruba ta cumpli comodamente cu e normanan financiero poni den e Ordenansa Nacional di Supervision Financiero Temporal di Aruba (LAft). Segun CAft, sector publico lo mustra un surplus di financiamento di 3.9% di e producto interno bruto (GDP) na 2025.

Na mesun momento e ta critica e forma con Aruba a aplica cierto reglanan di presupuesto, particularmente den compensacion di gastonan adicional y procesamento di fondonan di inversion.

Den e presupuesto original adopta pa 2025, Aruba a asumi un surplus di financiamento di Afl. 78 miyon (mas o menos 1% di GDP) pa e pais y Afl. 192 miyon (2.4% di GDP) pa henter e sector publico. Esaki ta considerablemente mas faborabel den e di dos amienda di presupuesto 2025.

CAft ta declara cu e surplus di financiamento pa e pais ta suma awor na Afl. 134 miyon (1.7% di GDP). Ta calcula un surplus di Afl. 309 miyon pa sector publico, cu ta coresponde na 3.9% di GDP. Segun e CAft, esaki ta cumpli comodamente cu e rekisito di saldo minimo di 1% di GDP.

CAft ta indica cu e ganashi inespera di e pais ta suma na Afl. 52 miyon. LAft ta stipula cu e ganashinan ey por ser aloca entre pago di debe y inversionnan. Segun CAft, Aruba a scoge pa usa mayoria di e ganashi aki, esta Afl. 43 miyon, pa pago di debe adicional. E restante Afl. 9 miyon lo ser destina pa inversionnan.

E Colegio ta considera e escogencia aki deseabel, specialmente pasobra gastonan di interes ta sigui pisa hopi riba e presupuesto. Segun CAft e interes ta suma mas o menos 16% di e presupuesto. Mas reduccion di debe por conduci finalmente na gastonan di interes mas abou y mas espacio pa otro metanan di politica.

Un punto clave di atencion den e conseho ta e acercamento di Aruba riba fondonan di inversion. Aruba a aloca sub-gasto riba inversionnan—fondonan cu lo no ser gasta pa 2025—a base di un solo biaha na un reserva designa. E reserva aki ta destina pa prepara pa establecimento di un fondo di inversion y desaroyo

CAft ta declara cu e procedura aki no ta cumpli completamente cu reglanan presupuestario, pasobra e fondo no a ser estableci formalmente ainda na momento di su adopcion. Di acuerdo cu reglanan existente, e tipo di gastonan ey mester ser libera for di e saldo di presupuesto. Si esaki sucede, e surplus lo tabata mas halto y mas espacio lo ser crea pa pago di debe.

Door cu esaki ta un procesamento di un solo biaha, no tin impacto pa logra e meta di saldo, y ta premira cu e fondo lo ser estableci den e prome kwartaal di 2026, CAft ta considera e enfoke aki aceptabel por lo pronto. Na mesun momento, e Colegio ta haci un yamado na Aruba pa finalisa e legislacion y structura di e fondo pa mas tarda e prome kwartaal di 2026.

Tambe CAft ta enfatisa cu anteriormente a pidi un agenda di inversion di varios aña. Ainda no a ricibi e agenda aki, pero Aruba a indica cu ta trahando riba dje. E ta kere cu e agenda di inversion aki mester ta disponibel no mas laat cu e prome amienda di presupuesto pa 2026.

Aunke cu CAft ta positivo riba e resultado financiero, e ta declara cu Aruba no a aplica corectamente e reglanan presupuestario di LAft y e protocol. E regulacionnan ta stipula cu entradanan adicional genera durante implementacion mester ser considera como ganashi inespera. E entradanan aki no por ser usa pa cubri gastonan adicional, pero mester ser usa pa pago di debe y inversionnan.

CAft ta constata cu Aruba no a compensa parti di e gastonan adicional – mas o menos Afl. 12 miyon – riba e parti di gasto, manera LAft a prescribi. En bes di esey, parti di e entrada a ser compensa pa un reduccion di Afl. 5 miyon den e calculacion di inversion.

E gastonan adicional ta relaciona principalmente cu transferencianan mas halto di mas o menos Afl. 9 miyon, pasobra e fondonan presupuesta anteriormente pa e aumento di e reparatietoeslag a resulta insuficiente. Segun CAft, e gastonan aki ta di indole structural y pues mester ser inclui tambe den e presupuesto di 2026. E Colegio ta urgi Aruba pa aplica e reglanan di presupuesto for di awor pa dilanti estrictamente.

E appendix cu e cifranan ta mustra cu e entradanan total den e di dos amienda di presupuesto adopta ta suma na Afl. 1.915 miyon. Esaki ta un aumento di Afl. 29 miyon compara cu e di dos concepto di amienda di presupuesto.

E aumento ta completamente debi na entradanan di impuesto mas halto. Belasting indirecto, en particular, a subi cu Afl. 24 miyon, mientras cu impuesto directo a subi cu Afl. 5 miyon.

Entradanan no-impuesto a subi cu Afl. 7 miyon, primordialmente debi na fondonan ricibi di e Landspakket. Na mesun momento, tin un ahuste bou di Afl. 7 miyon pa tarifanan, multa, y otro entradanan.

Gastonan total ta subi cu Afl. 14 miyon, yegando Afl. 1.715 miyon. E aumento mas grandi ta den transferencia (Afl. 9 miyon), sigui pa bienes y servicio (Afl. 2 miyon). Segun CAft, e transferencianan mas halto ta relaciona pa gran parti cu recursonan adicional pa e reparatietoeslag, mientras cu e aumento di bienes y servicio ta relaciona primordialmente cu gastonan di Landspakket.

Gastonan di personal ta keda practicamente mescos y ta subi cu solamente Afl. 0.4 miyon debi na cambionan tecnico entre ministerionan. Subsidio y contribucion ta aumenta un poco, parcialmente debi na obligacionnan basa riba proyecto. CAft ta declara cu e desaroyo di gastonan ta keda controla y en gran parti fundamenta.

Segun CAft, e debe di sector publico lo suma Afl. 4.830 miyon na 2025, cu ta representa mas o menos 60% di GDP. Pues Aruba ta riba bon caminda pa yega na un cuota di debe di 50% di GDP pa 2040.

CAft ta reporta cu Aruba mester a haci un total di Afl. 534 miyon na pago di debe na 2025. E suma cu a ser usa for di propio recurso pa pago di debe a ser aumenta di Afl. 114 miyon pa Afl. 135 miyon den e amienda di presupuesto, parcialmente debi na e ganashi inespera.

Ademas a refinancia Afl. 165 miyon riba mercado domestico den e di dos kwartaal, y Afl. 255 miyon lo ser refinancia riba mercado exterior den e di cuatro kwartaal. Conseho di Minister di Reino a aproba esaki.

CAft ta declara cu Aruba tambe ta cumpli cu e target di gastonan di personal. E gastonan total di personal lo suma Afl. 510 miyon na 2025, esta 6.4% di GDP. Esaki ta representa un aumento di Afl. 41 miyon compara cu 2024, primordialmente debi na indexering di salario di ambtenaar.

E di tres rapport di implementacion ta anticipa cu e gastonan di personal den e sentido mas amplio lo alcansa 9% di GDP. Esaki lo mantene Aruba bou di e plafond di 10 % cu ta bay aplica entrante 2027 en adelante.

E cifranan faborabel pa e sector publico ta parcialmente influencia pa resultadonan positivo na varios entidad clave. AZV ta premira un resultado positivo di Afl. 107 miyon na 2025, cual ta Afl. 21 miyon mas halto cu den e di dos concepto di amienda di presupuesto.

Tambe ATA ta mustra un resultado positivo di Afl. 49 miyon, cual ta Afl. 39 miyon mas halto cu loke a ser presupuesta anteriormente. Hunto cu resultadonan di institutonan manera SVb, esaki ta contribui na e surplus total di Afl. 309 miyon pa e sector colectivo.

Segun CAft, Aruba ta trahando riba fortificacion di su maneho financiero den cuadro di e Landspakket. E Colegio a tuma nota di adelanto: a reduci e atraso di rapportnan di ehecucion, y e cuentanan anual di 2019 a keda entrega na Parlamento.

E cuenta anual 2020 a ser entrega na Algemene Rekenkamer Aruba y ta ser revisa. E cuentanan anual di 2021 te cu 2024 tambe a ser entrega, pero e procesamento no a cuminsa ainda.

Finalmente, CAft ta ripiti e importancia di un determinacion rapido di e sector publico den coordinacion cu CBS Aruba, CBS Hulanda y Ministerio di Interior y Relacionnan den Reino, pasobra un demarcacion corecto ta esencial pa un imagen realistico di e posicion di debe di Aruba.

CAft ta conclui cu, cu e di dos amienda di presupuesto adopta pa 2025, Aruba ta den un posicion financiero fuerte y ta cumpli cu e norma di balansa, norma di gastonan di personal y e trayecto di reduccion di debe, usando mayoria di e ganashi inespera pa pago adicional di debe, loke CAft ta considera prudente mirando e interesnan halto, pero e ta adverti cu aplicacion di e reglanan di presupuesto no semper ta corecto y cu e reserva temporal pa un fondo di inversion ainda ta rekeri finalisacion rapido di legislacion y planificacion cla.