Colegio di Supervision Caft a duna un contesta bastante fuerte riba un carta reciente cu nan a haya di ministro di finanzas, unda nan ta duna di comprende cu riba varios aspecto e ministro a informa nan cu e no tin intencion di sigui nan recomendacionnan. E carta di e ministro a keda confidencial, pero e carta di Caft a aparece manera custumber riba nan website: cft.cw

Ta trata concretamente di e recomendacionnan cu Caft a haci den nan comentario riba e prome reportahe financiero pa 2019, di e prome tres luna. Den e carta Caft ta referi na compromisonan existente, basa riba e ley LAft existente y e protocol di 22 di november 2018.

En general CAft ta constata cu ministro no tin intencion di sigui cierto recomendacionnan di CAft, y cu tin otro recomendacion cu e ministro no ta aclara suficientemente, segun CAft.

Un punto cardinal ta e recomendacion cu e gastonan di personal, cu lo haci den cuadro di e fondo presupuestario di e Plan di Crisis Social lo mester keda incorpora bao di e limite estableci den e protocol, cu ta Afl. 479 miyon. For di reaccion di e mandatario CAft ta saca e conclusion cu e no tin intencion di tene cuenta cu e recomendacion aki. Di e cifranan di e raportahe di prome kwartaal 2019 por destila cu e gastonan di personal di e Plan di Crisis ta percura caba pa sobrepasa e limite estableci. Cu esaki, segun CAft, no ta cumpli cu e protocol y no ta sirbiendo e meta di yega na finanzas publico duradero. Tampoco e mandatario ta bisa cu lo sigui e recomendacion pa haci adaptacion necesario den e segundo reportahe (na mita di aña). Tambe CAft lo desea di mira un concretisacion mas solido di e medidanan contempla den e Plan di Reduccion di Gasto di Personal(Beleidsplan Verlaging Personeelslasten;(BVP) cu mester cuadra cu e norma di baha gasto di personal di Afl. 479 miyon pa 2019.

Otro punto di controversia ta e recomendacion pa acorda cu Hulanda un norma adicional pa e gastonan di personal di Staten, Raad van Advies, Algemene Rekenkamer (e asina yama ‘Hoge Colleges van Staat) y DOW. (E entidadnan aki awor no ta cay bao di e Afl. 479 miyon pero ta pertenece na e gastonan permanente di gobierno y ta parti di gobierno den sentido mas amplio tambe; red.). Esaki lo implica un norma nobo mas halto cu e Afl. 479 miyon acorda den e protocol actualmente. CAft ta expresa cu ta importante pa esaki keda regla.

Otro punto di dolor pa CAft ta cu nan ta desea di tin un plan di reforma fiscal integral y multi-anual. A base di esey lo por duna un bon splicacion di e medidanan fiscal cu tin pensa pa tuma e aña aki ainda, como parti di e plan total. “Den su reaccion e ministro ta indica cu e lo informa CAft ‘per fase’ di e reforma fiscal.” Sin embargo, CAft ta keda enfatisa e importancia di tin un plan di reforma multi-anual, sino no ta posibel pa e colegio evalua si e entrada pa 2019 y añanan despues ta realistico. CAft ta constata cu e ministro no tin intencion di presenta un plan fiscal multi-anual y cu esaki tambe ta en pugna cu LAft y Comptabiliteitsverordening di Aruba.

Por ultimo CAft ta pidi atencion pa e gastonan creciente di AZV y con e ministro tin pensa di atende esaki. Den su reaccion segun CAft ministro no a indica con ta tuma accion pa e resultado di AZV no bay contribui negativamente na cumplimento cu e norma di deficit di 0,5% di GDP pa 2019.

CAft ta pidi e mandatario pa reacciona pa mas tarda 28 di juni proximo, con ainda ta bay atende e recomendacionnan duna. “Si segun CAft despues di 28 di juni venidero ainda tin caso di no cumpli suficientemente cu e recomendacionnan pa cual lo tin (insuficiente) cumplimento cu e normanan menciona, CAft lo informa Conseho di Ministro di Reino. E notificacion ey por bay acompaña cu un conseho motiva pa duna un instruccion (‘aanwijzing’). Asina CAft a termina nan carta cu no a laga tanto na imaginacion.