Pictures by © Berber van Beek
Raymond Gradus, presidente di CAft

Manera priminti, e organismo di supervision financiero CAft a pone riba su website e rapport encuanto overtime den aparato gubernamental na Aruba, despues di a entrega esaki recientemente na gobierno di Aruba.

Den su resumen di e rapport, CAft ta describi con e iniciativa a surgi despues di a firma e protocol na november 2018, entre gobierno di Aruba y di Hulanda, unda e reduccion di e gastonan di personal tabata un punto importante. Parti grandi di e gastonan general ta esun di personal, unda na su turno e gastonan di personal ta hunga un papel importante. CAft a tuma e tarea riba nan mes pa haci un analisis di e gastonan aki, pa bin cu sugerencia con pa haya miho control riba esakinan. Concretamente kier a haya sa pakico e gastonan di overtime ta asina halto y con por yega na reduci esakinan. E analisis, pa cual a haya cooperacion di e departamentonan concerni, cu tabata Cuerpo Policial (KPA), Aduana, KIA y Cuerpo di Bombero (Brandweer). Contraloria General (Rekenkamer) tambe ta interesa den e materia aki y actualmente ta haciendo un analisis cerca Cuerpo Especial Arubano (CEA), KPA y KIA.

E resultado di e analisis di CAft ta duna un imagen remarcable, pero no inespera: cerca tur e servicionan investiga tin hopi overtime cu pa hopi di e empleadonan ta un parti substancial di loke nan ta cobra tur luna. CAft ta puntra su mes con por ta cu varios empleado di un cierto departamento por ta trahando como promedio 30 ora pa siman extra. Segun CAft esey ta un peso laboral cu ta trece cierto riesgo cune pa salud di e empleadonan y tambe pa seguridad di e empleadonan den ehecucion di nan trabao.

CAft ta haya tambe cu gobierno lo mester haci investigacion encuanto e responsabilisacion y administracion di overtime cerca e departamentonan analisa. Tambe ta constata cu preocupacion cu e ausencia pa motibo medico (AO), den henter e aparato publico ta hopi halto, na 8%. Den tres di e cuatro cuerponan investiga e ausencia tabata mas halto cu e 8% ey ainda. Sin embargo, no a haci analisis specifico si ta ausencia pa enfermedad ta conduci na overtime o cu e relacion lo ta contrario. E cifranan ta duna en todo caso un corelacion positivo entre ausencia pa AO y overtime.

Ta constata cu e reglanan den e actual legislacion ta brinda suficiente posibilidad pa actua contra exceso di overtime pero cu no ta usa esakinan suficientemente. Ademas e reglanan actual ta duna suficiente herment tambe pa tuma medida contra ausencia pa enfermedad excesivo. Ta necesario pa crea e debido colaboracion entre e ministro concerni, ministro encarga cu finanzas, Departamento Recurso Humano (DRH), SVb y e departamentonan concerni pa reduci tanto overtime como AO.

CAft ta observa tambe cu e gastonan halto di overtime mientras tanto ta riba agenda di gobierno tambe, pero cu ainda lo mester tuma paso pa bay di atencion pa medida concreto na nivel di henter gobernacion. Tambe lo ta necesario, segun CAft, pa logra un cambio di cultura den e departamentonan gubernamental, specificamente e servicionan di ehecucion, analisa den e rapport, pasobra regularmente ta mira overtime caba como un derecho adquiri. Ta importante cu e sindicatonan den e asunto aki tambe asumi nan responsabilidad, segun CAft. Actualmente e ausencia halto pa via di AO segun CAft no ta haya suficiente atencion. Desaroyo di un maneho pa ausencia di enfermedad pa henter e aparato publico incluyendo e stipulacion di e medidanan di sancion disponible por ta un prome paso pa reduci ausencia di enfermedad.

 

LEAVE A REPLY

Please enter your comment!
Please enter your name here