Recientemente Colegio di Supervision Financiero di Aruba (CAft) a emiti su conseho riba presupuesto nacional di pais Aruba pa aña 2025. Anteriormente e colegio a duna su conseho tambe riba e amienda di e proyecto di presupuesto cu a ser presenta pa e fraccion AVP y Futuro den Parlamento di Aruba. Segun CAft, e presupuesto tin algun cambio chikito compara cu e amienda.

Riba 2 di april 2025, minister di Finanzas, Economia y Sector Primario, Geoffrey Wever, a entrega e presupuesto nacional 2025 di Aruba na CAft. Segun CAft mirando cu e diferencia entre e proyecto di amienda di presupuesto y e presupuesto mes ta minimo, e hallazgo y recomendacionnan di CAft ta keda plenamente aplicable.

Den su conseho CAft ta indica cu pa 2025 ta presupuesta un surplus di financiamento di 192 miyon florin, locual ta ekivalente na 2,4% di e producto nacional bruto (bbp). Tambe pa e periodo 2026-2029, gobierno ta presenta un surplus anual. E Colegio ta remarca cu di e manera aki, Aruba ta cumpli cu e norma presupuestario pa e saldo di financiamento di e sector colectivo di como minimo 1% di e bbp y cu e compensacion di deficit prescribi.

Na mesun momento CAft ta enfatisa cu considerando e tensionnan geopolitico persistente y e incertidumbre rond di e perspectivanan economico na nivel mundial, ta importante pa hiba un maneho presupuestario cauteloso.

Pa loke ta e splicacion di modificacionnan presupuestario, e Colegio ta indica cu e presupuesto ta contene modificacionnan minimo compara cu e proyecto di amienda. E modificacionnan, CAft ta señala, principalmente tin di haber cu e gastonan di personal, traspasonan y e budget di capital.

Un di e cambionan aki, CAft ta splica, ta cu den e proyecto di amienda a baha e gastonan di personal cu 9 miyon florin, bahando e cantidad di Fte cerca e oficinanan di e ministernan, pero den e presupuesto a dicidi pa no implementa e ahorro aki por lo pronto.

Den su conseho CAft ta enfatisa e importancia di control structural di gastonan, considerando e hecho cu desde 2022, e gastonan di personal a aumenta cu aproximadamente 20%. Desde 2024, conforme e LAft, un norma di gastonan di personal nobo ta aplicabel. Desde 2027, e gastonan di personal den sentido amplio mester keda bao di e plafond di 10% di e bbp.

Den 2024 e gastonan aki tabata yega te 8% di e bbp, sinembargo CAft ta subraya, ainda falta un calculacion multianual di e gastonan di personal. CAft a indica cu ta desea di ricibi e datonan necesario – manera Aruba a priminti anteriormente – pa por evalua si e maneho actual ta cuadra cu e marconan cu a establece den e contexto ey.

Manera ta conoci tambe entrante 1 di mei 2025 a aumenta e reparatietoeslag pa pensionadonan cu 250 florin pa luna. Sinembargo, CAft ta señala, a baha e gastonan calcula di 49 miyon florin te 43 miyon florin, un bahada di 6 miyon florin. Esaki a conduci na un bahada di e partida traspasonan. Anteriormente, e Colegio a conseha pa aplica un comprobacion di ingresonan na momento di otorga e reparatietoeslag y ta haya positivo cu ta dunando substancia na e punto aki.

CAft ta sigui splica den su conseho cu den e di dos nota di modificacion di e proyecto di presupuesto pa 2025, a inclui un suma di 20 miyon florin pa otorgamento di credito local y subsidio na Fundacion Cas Pa Comunidad Arubano (FCCA). E gobierno actual a reverti e decisionnan aki, tuma pa e Gabinete anterior. Tanto e prestamo di 17 miyon florin como e subsidio di 3 miyon florin a keda elimina di e presupuesto, y posiblemente lo bolbe inclui nan den e prome presupuesto complementario di 2025.

CAft ta enfatisa cu e modificacionnan menciona den total ta conduci na un mehoracion di e saldo di financiamento di 17 miyon florin. E Colegio ta remarca cu di e manera aki, e saldo di financiamento di pais ta aumenta te 78 miyon florin, locual ta ekivalente na 1% di e bbp. Den total, e surplus di e sector colectivo ta subi te 192 miyon florin, cual ta ekivalente na 2,4% di e bbp.

Pa loke ta trata e ratio di debe, e Colegio ta splica cu na final di 2025, e debe di Aruba lo subi te 5.187 miyon florin, cual ta 65% di e bbp. Sinembargo, CAft ta indica, e desaroyo aki solamente tin di haber cu e debe di e pais, no cu esun di henter e sector colectivo. E Colegio ta splica cu no ta cla ainda di ki manera lo componi e sector colectivo na 2025, pasobra ainda no a determina esaki. P’esey, e Colegio no por evalua di ki manera e posicion di debe lo desaroya riba termino largo.

CAft ta subraya cu a pesar cu e imagen actual ta mustra positivo, mester tene cuenta cu e composicion di e sector colectivo na 2025, y su posibel implicacionnan pa e ratio di debe. Mas reduccion di debe ta keda di importancia pa fortalece e resiliencia financiero di Aruba.

Por ultimo, pa loke ta e pasonan siguiente cu mester tuma CAft ta deduci di e presupuesto cu Aruba tin intencion di duna substancia na e recomendacionnan cu CAft a emiti tocante di e amienda. E Colegio ta splica cu por ehempel, Aruba ta indica cu lo emplea e surplusnan di Algemene Ziektekostenverzekering (AZV) y Sociale Verzekeringsbank (SVb) pa reduccion di debe.

Banda di esaki, ta presenta e desaroyo multianual di e debe y e gastonan di personal conforme e definicionnan di e LAft den e prome presupuesto complementario pa 2025. Ademas, Aruba lo elabora un agenda di inversion pa e periodo 2025-2035, adapta na e capacidad di ehecucion di e pais y dirigi riba maneho economico duradero. CAft a bolbe enfatisa e importancia di e recomendacionnan aki, y ta anticipa e elaboracion mas detaya di e iniciativanan aki den e prome presupuesto complementario.